లగడపాటి-చిరులపై పయ్యావుల కేశవ్ ఫైర్

Posted: 08/05/2013 11:50 AM IST

విజయవాడ పార్లమెంటు సభ్యుడు లగడపాటి రాజగోపాల్‌ వ్యాపారం ముఖ్యమని, కేంద్రమంత్రులు చిరంజీవికి పదవి ముఖ్యమని, తెలుగుదేశం పార్టీ సీనియర్ ఎమ్మెల్యే పయ్యావుల కేశవ్ మండిపడ్డారు. పద్ధతి ప్రకారం రాష్ట్రాన్ని విభజించలేదన్నారు. సీమాంధ్ర కాంగ్రెసు నేతలను తాయిలాలు, బెదిరింపుల ద్వారా అధిష్టానం దారిలోకి తెచ్చుకుందని విమర్శించారు. కాంగ్రెసు పార్టీ సీమాంధ్ర నేతలకు చిత్తశుద్ధి ఉంటే ప్రజల కష్టాలను పార్లమెంటు దృష్టికి తీసుకు వెళ్లాలని సవాల్ చేశారు. పద్ధతి ప్రకారం విభజన జరగలేదని, కాంగ్రెసు పార్టీ రాజకీయ కోణంలోనే విభజన చేసిందన్నారు. లగడపాటి కేవలం టివిలకే పరిమితం కాకుండా సీమాంధ్రులకు న్యాయం జరిగేలా ప్రయత్నించాలన్నారు. ప్రజలను ఇక్కడ గల్లీలో ఉద్యమం చేసి మభ్యపెట్టవద్దన్నారు. ఆయనకు దమ్ముంటే ఢిల్లీలో ఆందోళన చేయాలని హితవు పలికారు. రాజమండ్రి పార్లమెంటు సభ్యుడు ఉండవల్లి అరుణ్ కుమార్ ఊసరవెల్లిలా మాట్లాడుతున్నారని విమర్శచించారు. రాజీనామాలు వద్దంటూనే కాంగ్రెసు నేతలు ఎందుకు రాజీనామా చేస్తున్నారని ప్రశ్నించారు. సీమాంధ్రుల్లో చీలిక తెచ్చే కుట్రని కాంగ్రెసు చేస్తోందన్నారు. అధిష్టానంతో కుదుర్చుకున్న ఒప్పందం మేరకే రాజీనామా డ్రామాలు ఆడుతున్నారని, మీ కుటిల యత్నాలకు తమ పార్టీ తలొగ్గదన్నారు.