Posted: 03/13/2012 06:37 PM IST

దేశంలో తొలిసారిగా విమాన మరమ్మతుల ప్రాజెక్టు హైదరాబాద్‌లో కానుంది. ప్రతిష్టాత్మకమైన ఈ ప్రాజెక్టు నిర్వహణ బాధ్యతలను మలేషియా ఏరోస్పేస్‌, జిఎంఆర్‌ సంస్థల సంయుక్తభాగస్వామ్యంతో చేపట్టనున్నారు. విమానాశ్రయ నిర్వహనణలో అంతర్జాతీయ ప్రమాణాలకు ప్రాధాన్యతనిచ్చిన శంషాబాద్‌ ఎయిర్‌పోర్టులో ఈ ప్రాజెక్టు అమలు చేసేందుకు కేంద్రప్రభుత్వం సుముఖత వ్యక్తం చేసింది.

దీంతో ఎట్టకేలకు ఇవాళ కేంద్రమంత్రి అజిత్‌ సింగ్‌ ఈ ప్రాజెక్టుకు అంకురార్పణ చేయనున్నారు. దేశానికే తలమానికమైన శంషాబాద్‌ ఎయిర్‌పోర్టు ఓ అంతర్జాతీయ ప్రాజెక్టును అమలు చేయనుంది. విమానాల్లో సాంకేతికలోపం తలెత్తినపుడు మరమ్మతులు చేసే మెయింటెనెన్స్‌ అండ్‌ రిపేర్‌ ఓవరాల్‌ ప్రాజెక్టును అమలు చేసేందుకు అనుమతి లభించింది. ఇదివరకు విమానాల్లో ఏదైనా సాంకేతికలోపం తలెత్తినపుడు సింగపూర్‌గానీ, మలేషియాగానీ వెళ్లాల్సి వచ్చేది. లేదా అక్కడి నిపుణులు వచ్చి చూసేవారు. గత ఐదు నెలలక్రితం భారీ విమయానం మలేషియానుంచి సౌదీకి వెళ్తూ సాంకేతికలోపం తలెత్తడంతో శంషాబాద్‌ ఎయిర్‌పోర్టులో ల్యాండ్‌చేశారు. దుబాయ్‌నుంచి నిపుణులు రావాల్సి వచ్చింది.

దీంతో విమానాల్లో సాంకేతిక లోపాలను గుర్తించి సరిజేసే పూర్తిస్థాయి ప్రాజెక్టును జిఎంఆర్‌ సంస్థ ఏర్పాటు చేసింది. దేశంలో ఎక్కడైనా విమానంలో సాంకేతికలోపం చోటుచేసుకుంటే శంషాబాద్‌ ఎయిర్‌పోర్టుకు రావాల్సి ఉంటుంది. మలేషియా ఏరోస్పేస్‌, జిఎంఆర్‌ సంస్థల సంయుక్త భాగస్వామ్యంతో తలపెట్టిన ఈ ప్రాజెక్టును కేంద్ర పౌరవిమానయాన శాఖమంత్రి అజిత్‌సింగ్, కేంద్రమంత్రి జైపాల్‌రెడ్డి, ముఖ్యమంత్రి కిరణ్‌కుమార్‌రెడ్డి లాంఛనంగా ప్రారంభించనున్నారు. అంతర్జాతీయ ప్రమాణాలతో దేశంలోనే తొలిగ్రీన్‌ఫీల్డ్‌ ఎయిర్‌పోర్టుగా రాణించిన శంషాబాద్‌ మెయింటెనెన్స్‌ రిపేరింగ్‌ ప్రాజెక్టు అమలుతో మరింత గుర్తింపు పొందనుంది.