ఎంబీ 25 కోసం ముగ్గురు దర్శకులు!

Posted: 09/21/2016 05:57 PM IST

ఏ హీరోకైనా కెరీర్ లో మైలు రాయి చిత్రాలు ప్రత్యేకంగా ఉండాలని కోరుకోవటం సహజం. బాలయ్య వందో సినిమా, చిరు 150 ఇలా ఆ ఫిగర్ లను బట్టి అభిమానులతోపాటు, హీరోలు కూడా స్పెషల్ గా ఫీలవుతుంటారు. ఇక ఈ యేడాది మొదట్లో యంగ్ టైగర్ ఎన్టీఆర్ కూడా నాన్నకు ప్రేమతో 25వ సినిమా చేసి హిట్ అందుకున్నాడు. ఈ నేపథ్యంలో మరో టాప్ హీరో పాతిక సినిమాపై ఇప్పుడు ఇండస్ట్రీ గురిపెట్టింది.

టాలీవుడ్ సూపర్ స్టార్ త్వరలోనే ఆ మైలు రాయిని అందుకోబోతున్నాడు. ప్రస్తుతం మురగదాస్ తో చేస్తున్న సినిమా 23వది. దీని తర్వాత కొరటాల శివతో 24వ సినిమా చేస్తాడు. ఇక పాతిక సినిమా ఎవరి చేతిలో పెడతాడు అన్న దానిపైనే ఇప్పుడు డిస్కషన్ మొదలైంది. ఎందుకంటే ఈ రేసులో ముగ్గురు డైరక్టర్లు ఉండటమే కారణం. సినిమా స్క్రిప్ట్ ఏంటో కూడా రూపొందించకుండానే జనగణ మన అనే టైటిల్ ను ఫిక్స్ చేసేసి ఓ పోస్టర్ ను రిలీజ్ చేసేశాడు స్పీడి డైరక్టర్ పూరి జగన్నాథ్. మహేష్ మానరిజంను టోటల్ గా మార్చేసి ఇప్పటికే పోకిరి, బిజినెస్ మెన్ లతో ట్రెండ్ సృష్టించిన ఈ కాంబో అయితేనే బావుంటుందని పలువురు అభిప్రాయపడుతున్నారు.

ఇక రెండో వ్యక్తి వంశీపైడిపల్లి. బృందావనం, ఎవడు, ఊపిరి హ్యాట్రిక్ హిట్లతో జోరు మీదున్న ఈ డైరక్టర్ తో మహేష్ సినిమాకి సంబంధించి అల్రెడీ నిర్మాతలు పీవీపీ వారు ప్రిన్స్ పుట్టినరోజున ఓ పోస్టర్ రిలీజ్ చేసేశారు కూడా. వైవిధ్యంగా తెరకెక్కించే వంశీ అయితేనే సెట్ అవుతుందని కొందరు అంటున్నారు. ఇక రేసులో కొత్తగా  వినిపిస్తున్న దర్శకుడు త్రివిక్రమ్. అతడుతో సైలెంట్ హిట్ కొట్టినప్పటికీ, ఖలేజాతో పెద్ద ఫ్లాపే ఇచ్చాడు మాటల మంత్రికుడు, అయితే మహేష్ ను కొత్త కోణంలో చూపాడన్న ఆనందం మాత్రం ప్రేక్షకులకు మిగిలిపోయింది. దీంతో ప్రతిష్టాత్మకమైన 25వ చిత్రాన్ని త్రివిక్రమ్ లాంటి అన్ని వర్గాల ఆదరణ ఉన్న దర్శకుడి చేతిలో పెట్టాలని ఇంకోందరు ఫ్యాన్స్ కొరుకుంటున్నారు. చూద్దాం వీరిలో ఎవరికి ఆ భాగ్యం దక్కబోతుందో?