సెకండ్ సినిమా సెంటిమెంట్ ...!

Posted: 06/11/2016 11:27 AM IST

అఖిల్ మొదటి సినిమా అఖిల్ ఫ్లాప్ అయినప్పటినుంచి తన సెకండ్ సినిమాపై కసరత్తులు చేస్తూనే ఉన్నాడు అక్కినేని కుర్రాడు. అయితే, ఇండస్ట్రీలో ఎలాంటి స్టార్ అయినా సరే నిలబడింది తన రెండో సినిమాలోనే. జూనియర్ ఎన్టీఆర్, అల్లు అర్జున్, రామ్ చరణ్ తేజ్, సాయి థరమ్ తేజ్, వరుణ్ తేజ్ ఇలా ప్రతి కుర్ర హీరో బ్లాక్ బస్టర్ హిట్ కొట్టింది తన రెండో సినిమాతోనే. ఇప్పుడు ఇదే సెంటిమెంట్ అఖిల్ ని కూడ వెంటాడుతోందట. అందుకే తన రెండో సినిమా దర్శకుడి ఎంపిక విషయంలో, కథ ఎంపిక విషయంలో ఆచితూచి అడుగులు వేస్తున్నాడు అఖిల్.

మొన్నటిదాకా వంశీ పైడిపల్లి తో హిందీలో సూపర్ హిట్ అయిన 'హే జవానీ హై దివానీ' సినిమాని రీమేక్ చేస్తున్నట్లుగా వార్తలు వినిపించాయి. కానీ, ఈ సినిమా తనకి సెట్ కాదని అందరూ చెప్పడంతో వంశీని మరో కొత్త కథ వినిపించమని కోరాడు. దాంతో వంశీ కొత్త కథపై కసరత్తులు మొదలెట్టాడు. ఈ గ్యాప్ లో అఖిల్ కన్ను హిట్ చిత్రాల దర్శకుడు అయిన కొరటాల శివపై పడింది. జూనియర్ ఎన్టీఆర్ తో తీస్తున్న జనతాగ్యారేజ్ సినిమాకి సోషల్ నెట్ వర్క్ లో వస్తున్న రెస్పాన్స్ చూసి ఈ డైరెక్టర్ వినిపించిన కథను సైతం విన్నాడట అఖిల్. అయితే, కొరటాల ప్రస్తుతం తారక్ తో బిజీగా ఉండటంతో ఆ సినిమాని కూడ వాయిదా వేసేశాడు.

ప్రస్తుతం కృష్ణగాడి వీర ప్రేమ గాధ సినిమాతో హిట్ కొట్టిన హను రాఘవపూడి చెప్పిన కథని ఓకే చేసినట్లుగా తెలుస్తోంది. అయితే, ఈ సినిమా కథలో కొన్ని మార్పులు కోరాడట అఖిల్. ఆ మార్పులు చేసిన తర్వాత అక్కినేని నాగార్జున కూడ ఆ కథను ఓకే చేస్తే సినిమా పట్టాలెక్కేసే సూచనలే ఎక్కువగా కనిపిస్తున్నాయి. మరి ఈ అక్కినేని కుర్రాడు తన రెండో సినిమా ఎలాంటిది చేస్తాడా అని ఫ్యాన్స్ ఆసక్తిగా ఎదురుచూస్తున్నారు.    

- మూర్తి