అమ్మడి రేటు అప్పుడే అంతా.. మరి ఇపుడెంతో?

Posted: 04/26/2016 01:17 PM IST

‘లెజెండ్’ తర్వాత దర్శకుడు బోయపాటి శ్రీను దర్శకత్వంలో బెల్లంకొండ సాయిశ్రీనివాస్ హీరోగా ఓ సినిమా ముహూర్త కార్యక్రమాలు జరుపుకుని, ఆగిపోయిన విషయం తెలిసిందే. ఈ ప్రాజెక్ట్ కొన్ని అనివార్య కారణాల వల్ల ఆగిపోవడంతో బోయపాటి శ్రీను.. స్టైలిష్ స్టార్ అల్లు అర్జున్ తో ‘సరైనోడు’ను తెరకెక్కించారు. ఈ సినిమా ఇటీవలే విడుదలై పాజిటివ్ టాక్ ను సొంతం చేసుకొని, కలెక్షన్ల మోత మోగిస్తోంది.

ఇదిలా వుంటే సాయిశ్రీనివాస్ సినిమా కోసం బోయపాటి శ్రీను భారీగా రెమ్యునరేషన్ అందుకున్నాడని తెలిసింది. తాజా సమాచారం ప్రకారం.. ఈ ప్రాజెక్ట్ కోసం బోయపాటి ఏకంగా 12కోట్ల రెమ్యునరేషన్ అందుకోనున్నాడని, అందులో 5కోట్లు అడ్వాన్స్ గా తీసుకున్నాడని వార్తలొస్తున్నాయి. ఈ రెమ్యునరేషన్ కేవలం తన గత చిత్రాల మరియు తన ప్రతిభను గుర్తించి ఆఫర్ చేసినట్లుగా సమాచారం. కానీ ‘సరైనోడు’ విడుదలై మరింత కలెక్షన్ల మోత మోగిస్తుండటంతో సాయిశ్రీనివాస్ సినిమాకు రెమ్యునరేషన్ పెంచుతాడో లేక 12 కోట్లకే కొనసాగుతాడో అనే విషయం తెలియాల్సి వుంది.

ఇక ఈ సినిమా కోసం ముందుగా రకుల్ ప్రీత్ సింగ్ ను హీరోయిన్ గా అనుకున్నారు. కానీ ఆ ప్రాజెక్ట్ ఆగిపోవడంతో రకుల్ డేట్స్ ను ‘సరైనోడు’ సినిమా కోసం తీసుకున్నట్లుగా తెలిసింది. సాయిశ్రీనివాస్ సినిమా కోసం రకుల్ కు కోటిన్నర రెమ్యునరేషన్ ఆఫర్ చేసినట్లుగా తెలిసింది. కానీ ఆ ప్రాజెక్ట్ ఆగిపోవడం... ప్రస్తుతం రకుల్ టాలీవుడ్ టాప్ 1 స్థానాన్ని సొంతం చేసుకోవడం వల్ల.. ఈ ప్రాజెక్ట్ కోసం తన రెమ్యునరేషన్ మరింతగా పెంచే అవకాశాలు కనిపిస్తున్నాయి.

ఇలా సినిమా నటీనటులు, సాంకేతికనిపుణులకే ఇంత రేంజులో రెమ్యునరేషన్ ఖర్చు చేస్తే... ఇక సినిమా మొత్తానికి నిర్మాతలు ఏ బడ్జెట్ ను ఖర్చుపెడతారో ఏమో. ‘సరైనోడు’ తర్వాత బోయపాటి శ్రీను దర్శకత్వంలో సాయిశ్రీనివాస్ సినిమా సెట్స్ పైకి వెళ్లనున్నట్లుగా తెలిసింది. మరికొద్ది రోజుల్లో ఈ ప్రాజెక్ట్ సెట్స్ పైకి వెళ్లనుంది.