మరో మలయాళం రీమేక్ లో వెంకీ?

Posted: 02/11/2016 04:22 PM IST

మొన్నటివరకు తెలుగులో విక్టరీ వెంకటేష్ నటించిన దాదాపు అన్ని రీమేక్ చిత్రాలు బాక్సాఫీస్ వద్ద ఘనవిజయం సాధించాయి. అయితే ఈ మధ్య మళ్లీ రీమేక్ సినిమాలపై వెంకటేష్ ఎక్కువ శ్రద్ధ చూపిస్తున్నాడు. ‘మసాలా’, ‘దృశ్యం’, ‘గోపాల గోపాల’ సినిమాలతో మళ్లీ రీమేక్ సినిమాల విక్టరీ హీరోగా తన హవా కొనసాగిస్తున్నాడు.

ఇపుడు వెంకీ మరో మలయాళం సినిమాను తెలుగులో రీమేక్ చేయడానికి సన్నాహాలు చేస్తున్నట్లుగా తెలిసింది. మలయాళంలో దిలీప్, మమతా మోహాన్ దాస్, ఇషా తల్వార్ ప్రధాన పాత్రలలో నటించిన ‘2 కంట్రీస్’ చిత్రం ఇటీవలే విడుదలై ఘనవిజయం సాధించింది. ఈ చిత్ర తెలుగు వర్షెన్ రీమేక్ హక్కులను నిర్మాత బండ్ల గణేష్ సొంతం చేసుకున్నాడు.

ఇదిలా వుంటే ఈ తెలుగు వర్షెన్ రీమేక్ లో నటించడానికి వెంకటేష్ సిద్ధంగా వున్నట్లుగా తెలిసింది. ఇటీవలే వెంకీ ‘2 కంట్రీస్’ చిత్రాన్ని చూసాడట. దీంతో ఈ సినిమా రీమేక్ లో నటించడానికి వెంకీ సానుకూలంగా వున్నట్లుగా తెలుస్తోంది. ఇక ప్రస్తుతం వెంకటేష్ హీరోగా మారుతి దర్శకత్వంలో రూపొందనున్న ‘బాబు బంగారం’ చిత్రం త్వరలోనే సెట్స్ పైకి వెళ్లనుంది.