యువరాజుగా రాబోతున్న నందమూరి మోక్షజ్ఞ?

Posted: 01/09/2016 12:20 PM IST

నందమూరి అభిమానులకు ఈ ఏడాది పండగలే పండగలు అన్నట్లుగా కనిపిస్తోంది. ఇక నందమూరి నటసింహం బాలకృష్ణ అభిమానుల గురించి ప్రత్యేకంగా చెప్పుకోనవసరం లేదు. ప్రస్తుతం బాలయ్య నటించిన ‘డిక్టేటర్’ చిత్రం ఈ సంక్రాంతి కానుకగా జనవరి 14న ప్రపంచ వ్యాప్తంగా భారీ ఎత్తున విడుదల కాబోతుంది. ఇప్పటికే థియేటర్ల వద్ద అభిమానుల సందడి మొదలయ్యింది.

ఇదిలా వుంటే బాలయ్య తనయుడు నందమూరి మోక్షజ్ఞ హీరోగా ఎంట్రీ ఇవ్వబోతున్నాడనే విషయం తెలిసిందే. ప్రస్తుతం నటనలో శిక్షణ పొందుతున్నాడు. మోక్షజ్ఞ హీరోగా ఎంట్రీ ఇవ్వబోయే సినిమా ఎలా వుండబోతుందోనని అభిమానులు ఎంతో ఆతృతగా ఎదురుచూస్తున్నారు. మాస్, క్లాస్, యాక్టింగ్, రొమాంటిక్, లవ్.. అంటూ ఏ క్యారెక్టర్ తో ఎంట్రీ ఇస్తాడోనని అభిమానులు చర్చించుకుంటున్నారు.

అయితే తాజా సమాచారం ప్రకారం మోక్షజ్ఞ ‘ఆదిత్య 369’ సీక్వెల్ లో నటించనున్నాడని సమాచారం. ప్రముఖ దర్శకుడు సింగీతం శ్రీనివాసరావు దర్శకత్వంలో బాలకృష్ణ నటించిన సినిమా ‘ఆదిత్య 369’. ఈ సినిమాతో నటుడిగా బాలయ్యకు మంచి పేరును తెచ్చిపెట్టింది. ‘ఆదిత్య 369’కు సీక్వెల్ గా ‘ఆదిత్య 999’ పేరుతో బాలయ్య 100వ చిత్రంగా తెరకెక్కించేందుకు సన్నాహాలు చేస్తున్నట్లుగా తెలిసింది. ఇందులోని కీలకపాత్ర అయినటువంటి యువరాజుగా మోక్షజ్ఞతో చేయించాలని బాలకృష్ణ మరియు సింగీతం భావిస్తున్నట్లుగా తెలిసింది.

అన్ని అనుకున్నట్లుగా జరిగితే త్వరలోనే ఈ ప్రాజెక్టు సెట్స్ పైకి వెళ్లనుంది. ఇప్పటికే ‘డిక్టేటర్’తో 99 చిత్రాలను పూర్తి చేసుకున్న బాలయ్య.. ఇంకా ఆలస్యం చేయకుండా ‘ఆదిత్య 999’ను ప్రారంభించడం ఖాయమని సినీవర్గాల సమాచారం. మరి మోక్షజ్ఞ ఎంట్రీ ఏ సినిమాతో వుంటుందో, ఎలా వుండబోతుందో త్వరలోనే తెలియనుంది.