థమన్ అదృష్టం చేజారిపోయినట్లేనా?

Posted: 12/11/2015 05:05 PM IST

నందమూరి బాలకృష్ణ హీరోగా దర్శకుడు శ్రీవాస్ దర్శకత్వంలో తెరకెక్కుతున్న తాజా చిత్రం ‘డిక్టేటర్’. భారీ బడ్జెట్ చిత్రాల నిర్మాణ సంస్థ ఈరోస్ ఇంటర్నేషనల్ బ్యానర్ మరియు వేదాశ్వ క్రియేషన్స్ సంస్థ సంయుక్తంగా నిర్మిస్తున్నారు. బాలయ్య సరసన అంజలి, సోనల్ చౌహన్, అక్ష హీరోయిన్లుగా నటిస్తున్నారు.

ఈ చిత్రానికి థమన్ సంగీతం అందిస్తున్నాడు. థమన్ సంగీతం అందించిన ఈ చిత్ర ఆడియోను ఈనెల 20వ తేదిన ఆంధ్రప్రదేశ్ కొత్త రాజధాని అమరావతిలో గ్రాండ్ గా విడుదల చేయనున్నారు. ఈ కార్యక్రమానికి ఆంధ్రప్రదేశ్ ముఖ్యమంత్రి శ్రీ నారా చంద్రబాబు నాయుడు గారు ముఖ్య అతిథిగా విచ్చేయనున్నారు.

అయితే ఈ సినిమా రీరికార్డింగ్ విషయంలో థమన్ చాలా బాధపడుతున్నాడట. అసలే రాక రాక బాలయ్య సినిమాకు సంగీత దర్శకుడిగా అవకాశం వస్తే, ప్రకృతి తనకు అడ్డుగా నిలుస్తుందని థమన్ బాధపడుతున్నాడట. ఇంతకీ అసలు విషయం ఏమిటంటే... ఇటీవలే చెన్నైలో భారీ వర్షాలు, వరదల కారణంగా చాలా మంది ఇబ్బందులను ఎదుర్కొంటున్నారు. అందులో థమన్ కూడా ఒకరు.

ఈ వర్షాలు, వరదల కారణంగా థమన్ రికార్డింగ్ స్టూడియో కూడా బాగా దెబ్బతిందట. దీంతో ‘డిక్టేటర్’ సినిమాకు రీరికార్డింగ్ విషయంలో కాస్త ఆలస్యం కానుందట. అందుకు మరో నెల రోజులు సమయం ఇస్తే ‘డిక్టేటర్’కు రీరికార్డింగ్ చేస్తానని, లేదంటే మణిశర్మతో రీరికార్డింగ్ చేయించుకోమని థమన్ ‘డిక్టేటర్’ దర్శకనిర్మాతలకు తెలియజేసాడని తెలిసింది. దీంతో తనకొచ్చిన అదృష్టం చేజారిపోయిందని థమన్ బాధపడుతున్నాడట.

అయితే విడుదల తేది దగ్గర పడుతుండటంతో చిత్ర దర్శకనిర్మాతలు కూడా మణిశర్మ వైపే మొగ్గుచూపుతున్నట్లుగా తెలుస్తోంది. ఎందుకంటే గతంలో బాలకృష్ణ నటించిన ఎన్నో చిత్రాలకు మణిశర్మ అద్భుతమైన సంగీతం అందించాడు. అంతేకాకుండా రీరికార్డింగ్ లో మణిశర్మకు మంచి పేరుంది. అందువల్ల ‘డిక్టేటర్’ చిత్రం రీరికార్డింగ్ బాధ్యతలను మణిశర్మకు అప్పజెప్పడానికి చిత్ర యూనిట్ సిద్ధమవుతున్నట్లుగా తెలుస్తోంది. త్వరలోనే అధికారికంగా ప్రకటించనున్నారు.

ఇప్పటికే విడుదలైన ఫస్ట్ లుక్ టీజర్ కు మంచి రెస్పాన్స్ వస్తోంది. భారీ బడ్జెట్ తో రూపొందుతున్న ఈ చిత్రానికి కథ, స్ర్కీన్ ప్లే ను ప్రముఖ రచయితలు కోన వెంకట్, గోపి మోహన్ లు అందిస్తున్నారు. చ్చే ఏడాది సంక్రాంతి కానుకగా ‘డిక్టేటర్’ ప్రేక్షకుల ముందుకు రాబోతున్నాడు. త్వరలోనే అన్ని వివరాలను అధికారికంగా ప్రకటించనున్నారు.