చెర్రీకి విలన్ గా మారనున్న లవర్ బాయ్

Posted: 10/08/2015 05:30 PM IST

Madhavan to play villain in ram charan next film

మెగాపవర్ స్టార్ రాంచరణ్ నటిస్తున్న ‘బ్రూస్ లీ’ చిత్ర షూటింగ్ శరవేగంగా జరుగుతోంది. ప్రస్తుతం ఈ చిత్రానికి సంబంధించిన టైటిల్ సాంగ్ ను చిత్రీకరిస్తున్నారు. థమన్ సంగీతం అందించిన ఈ చిత్ర ఆడియో ఇటీవలే విడుదలై బ్లాక్ బస్టర్ హిట్స్ గా నిలుస్తున్నాయి.

శ్రీనువైట్ల దర్శకత్వంలో రూపొందిన ఈ చిత్రాన్ని తెలుగు, తమిళం భాషలలో అక్టోబర్ 16న ప్రపంచ వ్యాప్తంగా గ్రాండ్ గా విడుదల చేయనున్నారు. ఇందులో చరణ్ సరసన రకూల్ ప్రీత్ సింగ్ హీరోయిన్ గా నటించింది. ఇదిలా వుంటే ‘బ్రూస్ లీ’ తర్వాత చరణ్ ‘తనీ ఒరువన్’ రీమేక్ లో నటించనున్నాడని వార్తలొస్తున్నాయి.

తమిళంలో ఇటీవలే విడుదలై భారీ విజయాన్ని సొంతం చేసుకున్న ఈ చిత్రంలో ప్రముఖ నటుడు అరవింద్ స్వామి విలన్ పాత్రలో నటించారు. అయితే ఈ చిత్ర తెలుగు రీమేక్ లో విలన్ గా ఇప్పటికే పలు తారలను అనుకున్నారు. విలన్ పాత్రలో నాగార్జున నటించబోతున్నట్లుగా వార్తలొచ్చాయి. కానీ నాగార్జున ఈ ప్రాజెక్టు చేయడం లేదు.

అయితే తాజాగా ఈ విలన్ పాత్ర కోసం తమిళ నటుడు మాధవన్ ను అనుకుంటున్నట్లుగా తెలిసింది. సాఫ్ట్ లుక్ లో కనిపిస్తూనే విలనిజం పండించే ఈ పాత్రకు మాధవన్ వంటి లవర్ బాయ్ ఇమేజ్ వున్న వ్యక్తి అయితేనే సరిపోతాడని చిత్ర యూనిట్ భావించి, మాధవన్ ను విలన్ పాత్ర కోసం అనుకున్నట్లుగా తెలిసింది.

త్వరలోనే ఈ ప్రాజెక్టు గురించి చిత్ర యూనిట్ మాధవన్ ను సంప్రదించనున్నారు. ప్రస్తుతం ఈ చిత్రానికి సంబంధించిన స్ర్కిప్టు పనులు తుది దశకు చేరుకున్నట్లుగా తెలిసింది. అన్ని వివరాలను మరికొద్ది రోజుల్లోనే అధికారికంగా ప్రకటించనున్నారు.