గోపిచంద్ కోసం సెంటిమెంట్ టైటిల్?

Posted: 10/03/2015 04:37 PM IST

‘సాహసం’, ‘లౌక్యం’, ‘జిల్’ వంటి వరుస భారీ బ్లాక్ బస్టర్ హిట్ చిత్రాల తర్వాత గోపిచంద్ హీరోగా తాజాగా ప్రముఖ దర్శకుడు ఏయస్ రవికుమార్ చౌదరి దర్శకత్వంలో ఓ చిత్రం తెరకెక్కుతున్న విషయం తెలిసిందే. దాదాపు పదేళ్ల తర్వాత రవికుమార్ చౌదరి దర్శకత్వంలో గోపీచంద్ హీరోగా నటిస్తున్న చిత్రం ఇది. భవ్య క్రియేషన్స్ పతాకంపై అత్యంత భారీ తారాగణంతో, భారీ బడ్జెట్ తో వి. ఆనంద్ ప్రసాద్ ఈ చిత్రాన్ని నిర్మిస్తున్నారు.

ఈ చిత్ర షూటింగ్ ఇప్పటికే 70 శాతం పూర్తయ్యింది. ప్రస్తుతం హైదరాబాద్ పరిసర ప్రాంతాల్లో షూటింగ్ జరుపుతున్నారు. అయితే ఈ చిత్రానికి ‘సౌఖ్యం’ అనే టైటిల్ ను ఖరారు చేసినట్లుగా తెలిసింది. గతంలో గోపిచంద్ నటించిన ‘యజ్ఞం’, ‘శౌర్యం’, ‘లౌక్యం’ వంటి టైటిల్స్ తో వచ్చిన చిత్రాలు మంచి విజయం సాధించాయి. ఇపుడు అదే సెంటిమెంట్ తో ఈ చిత్రానికి ‘సౌఖ్యం’ అనే టైటిల్ ఖరారు చేసినట్లుగా తెలిసింది.

గోపీచంద్ సరసన రెజీనా కథానాయికగా నటిస్తున్న ఈ చిత్రంలో షావుకారు జానకి, జయప్రకాశ్ రెడ్డి, పోసాని కృష్ణమురళి, రఘుబాబు, పథ్వీ, అశుతోష్ రానా, ప్రదీప్ రావత్, నాజర్, ముఖేష్ రుషి, సురేఖావాణి, సత్యకృష్ణ తదితరులు నటిస్తున్న ఈ చిత్రానికి స్ర్కీన్ ప్లే: కోన వెంకట్-గోపీ మోహన్, కెమెరా: ప్రసాద్ మూరెళ్ల, సంగీతం: అనూప్ రూబెన్స్, కథ-మాటలు: శ్రీధర్ సీపాన, ఎడిటింగ్: గౌతంరాజు, ఆర్ట్: వివేక్ అన్నామలై.