‘బ్రూస్ లీ’కి పవర్ స్టార్ వాయిస్ ఓవర్?

Posted: 09/09/2015 10:14 AM IST

మెగాపవర్ స్టార్ రాంచరణ్ తేజ హీరోగా నటిస్తున్న ‘బ్రూస్ లీ’ సినిమాపై రోజురోజుకి అంచనాలు భారీగా పెరిగిపోతున్నాయి. ఇప్పటికే విడుదలైన టీజర్లకు భారీ రెస్పాన్స్ వస్తుంది. భారీ అంచనాలతో తెరకెక్కుతున్న ఈ చిత్రాన్ని ప్రముఖ దర్శకుడు శ్రీనువైట్ల దర్శకత్వంలో డివివి ఎంటర్ టైన్మెంట్స్ బ్యానర్ పై ప్రముఖ నిర్మాత డివివి దానయ్య నిర్మిస్తున్నారు.

ఇందులో మెగాస్టార్ చిరంజీవి ఓ స్పెషల్ గెస్ట్ పాత్రలో కనిపించబోతున్న విషయం తెలిసిందే. ఇందులో దాదాపు 15 నిమిషాల వరకు చిరంజీవి పాత్ర వుండనుందని తెలిసింది. అయితే తాజాగా ఈ సినిమాకు మరో పవర్ వచ్చి చేరినట్లుగా తెలిసింది. ఆ పవర్ పేరే పవర్ స్టార్ పవన్ కళ్యాణ్.

ఈ చిత్రానికి పవన్ కళ్యాణ్ వాయిస్ ఓవర్ ను అందించనున్నాడని తెలిసింది. కానీ ఈ విషయంపై ఇంకా ఎలాంటి అధికారిక ప్రకటన వెలువడలేదు. ఒకవేళ ఇదే నిజమైతే... చరణ్ బ్రూస్ లీగా, మెగాస్టార్ గెస్ట్ రోల్, పవర్ స్టార్ వాయిస్ ఓవర్... ఇలా పలు క్రేజీ కాంబినేషన్లతో రూపొందనున్న ఈ సినిమా భారీ విజయం సాధించడం ఖాయమని సినీవర్గాలు అంచనా వేస్తున్నాయి.

కమర్షియల్ ఫ్యామిలీ, లవ్, యాక్షన్ ఎంటర్ టైనర్ గా రూపొందుతున్న ఈ చిత్రంలో చరణ్ సరసన రకూల్ ప్రీత్ సింగ్ హీరోయిన్ గా నటిస్తుంది. ప్రస్తుతం ఈ చిత్రానికి సంబంధించిన ఇంట్రడక్షన్ సాంగ్ షూటింగ్ జరుగుతోంది. ప్రముఖ డాన్స్ కొరియోగ్రాఫర్ జానీ మాస్టర్ నేతృత్వంలో ఈ పాటను చిత్రీకరిస్తున్నారు.

ఈ చిత్రానికి థమన్ సంగీతం అందిస్తున్నాడు. ఈ చిత్ర ఆడియోను త్వరలోనే విడుదల చేయనున్నారు. ఈ చిత్రానికి కథను కోన వెంకట్, గోపి మోహన్ లు అందిస్తున్నారు. ఈ చిత్రాన్ని అక్టోబర్ 16న ప్రపంచ వ్యాప్తంగా విడుదల చేయబోతున్నట్లుగా ఇప్పటికే చిత్ర యూనిట్ ప్రకటించారు.