అనుష్క రుద్రమదేవి మళ్లీ వాయిదా పడ్డట్లేనా?

Posted: 08/27/2015 10:49 AM IST

Anushka rudramadevi movie release date postponed

‘బాహుబలి’ తర్వాత అనుష్క నటించిన తాజా చిత్రం ‘రుద్రమదేవి’. ఎప్పుడో విడుదల కావాలసిన ఈ చిత్రం ఇంకా పోస్ట్ ప్రొడక్షన్ కార్యక్రమాలు జరుపుకుంటూనే బిజీగా వుంది. శ్రీమతి రాగిణీ గుణ సమర్పణలో గుణా టీం వర్క్స్ బ్యానర్ పై ప్రముఖ దర్శకుడు గుణశేఖర్ స్వీయ దర్శకనిర్మాణం తెరకెక్కుతోంది.

ప్రస్తుతం పోస్ట్ ప్రొడక్షన్ కార్యక్రమాలు శరవేగంగా జరుగుతున్నాయి. ఈ చిత్రాన్ని సెప్టెంబర్ 4వ తేదిన విడుదల చేయబోతున్నట్లుగా చిత్ర యూనిట్ అధికారికంగా ప్రకటించారు. అయితే తాజా సమాచారం ప్రకారం ఈ చిత్ర విడుదలను సెప్టెంబర్ 17కు వాయిదా వేసినట్లుగా తెలిసింది.

ఈ చిత్రాన్ని తెలుగుతో పాటు తమిళం, మలయాళం భాషలలో కూడా విడుదల చేయనున్న విషయం తెలిసిందే. అంతేకాకుండా ఈ చిత్రాన్ని 3D ఫార్మెట్ లో కూడా విడుదల చేయబోతున్నారు. అందువల్ల డిజిటల్ గ్రాఫిక్స్ విషయంలో మరింత ఎక్కువ జాగ్రత్తలు తీసుకుంటున్నారు. త్వరలోనే ఈ చిత్ర కొత్త విడుదల తేదిని అధికారికంగా ప్రకటించనున్నారు.

ఇప్పటికే ఈ చిత్ర ప్రమోషన్ కార్యక్రమాలు మొదలయ్యాయి. రుద్రమదేవి పాత్రలో అనుష్క నటించగా, గోనగన్నారెడ్డి పాత్రలో స్టైలిష్ స్టార్ అల్లు అర్జున్ నటించాడు. అలాగే ఈ చిత్రంలో రానా ఓ కీలక పాత్రలో నటించాడు. నిత్యామీనన్, ప్రకాష్ రాజ్, కృష్ణంరాజు తదితరులు ముఖ్య పాత్రలలో నటించారు. ఇళయరాజా సంగీతం అందించిన ఆడియో ఇప్పటికే విడుదలై మంచి టాక్ ను సొంతం చేసుకుంది.