ఈ అమ్మడు ఐటెం సాంగుతో రీఎంట్రీ ఇవ్వనుందా?

Posted: 05/05/2015 10:44 AM IST

ప్రముఖ దర్శకుడు వి.వి.వినాయక్ దర్శకత్వంలో అక్కినేని అఖిల్ హీరోగా ఓ చిత్రం తెరకెక్కుతున్న విషయం తెలిసిందే. అన్నపూర్ణ స్టూడియోస్ సమర్పణలో శ్రేష్ఠ్ మీడియా పతాకంపై హీరో నితిన్ ఈ చిత్రాన్ని నిర్మిస్తున్నారు. అఖిల్ సరసన సయేశా సైగల్ హీరోయిన్ గా నటిస్తుంది. కోన వెంకట్ – గోపి మోహన్ లు స్క్రీన్ ప్లే, మాటలు సమకూరుస్తున్నారు.

అయితే ఈ సినిమాలో రాశిఖన్నా ఓ స్పెషల్ సాంగ్ లో నటించడానికి గ్రీన్ సిగ్నల్ ఇచ్చిందని గతంలో వార్తలొచ్చాయి. అఖిల్ తో పాటు రాశిఖన్నా ఓ హాట్ మాస్ మసాలా సాంగ్ లో చిందులేయనుందని వార్తలొచ్చాయి. కానీ ఈ వార్తలను రాశిఖన్నా కొట్టిపారేసింది. తాను ఏ సినిమాలోను కూడా ఐటెం సాంగులు చేయడం లేదని, ప్రస్తుతం వరుస చిత్రాలతో బిజీగా వున్నానని తేల్చేసింది.

కానీ ఈ ఐటెం సాంగ్ ఆఫర్ తాజాగా ఇలియానాకు దక్కినట్లుగా తెలిసింది. అసలే తెలుగులో మళ్లీ రీ ఎంట్రీ ఇవ్వాలని ఎంతో ఆతృతగా ఎదురుచూస్తున్న ఇలియానాకు ఈ చిత్ర దర్శకనిర్మాతలు ఈ ఐటెం సాంగ్ ఆఫర్ చేసినట్లుగా తెలిసింది. ఇందుకు ఇలియానా కూడా గ్రీన్ సిగ్నల్ ఇచ్చినట్లుగా సమాచారం. కానీ ఈ ఐటెం సాంగ్ కోసం ఇలియానా భారీ మొత్తంలో రెమ్యునరేషన్ డిమాండ్ చేసినట్లుగా తెలిసింది.

ప్రస్తుతం ఈ ఐటెం సాంగ్ విషయంలో ఈ భామతో చర్చలు జరుపుతున్నారని తెలిసింది. త్వరలోనే అన్ని వివరాలు అధికారికంగా ప్రకటించనున్నారు. ఈ చిత్రానికి థమన్, అనూప్ లు సంగీతం అందిస్తున్నారు. ప్రస్తుతం ఈ చిత్ర షూటింగ్ శరవేగంగా జరుగుతోంది. ‘మిసైల్’ అనే టైటిల్ ను పరిశీలిస్తున్నారు. ఇప్పటికే విడుదలై ఫస్ట్ లుక్ టీజర్ కు భారీ స్పందన వస్తోంది. షూటింగ్ త్వరగా పూర్తి చేసుకొని, దసరా కానుకగా విడుదల చేయడానికి చిత్ర యూనిట్ సన్నాహాలు చేస్తున్నారు.