నాని కెరీర్ కి ఆ రెండు సినిమాలే సవాళ్లు!

Posted: 03/09/2015 04:04 PM IST

Hero nani yevade subramanyam jendapai kapiraju movie updates

‘ఈగ’ చిత్రంలాంటి భారీ విజయాన్ని అందుకున్న హీరో నాని.. అప్పటినుంచి తిరిగి ఒక్క సక్సెస్ కూడా సాధించలేకపోయాడు. అతడు నటించిన సినిమాలన్నీ వరుసగా బాక్సాఫీస్ దగ్గర టపీటపీమని ఫెయిలయ్యాయి. దీంతో ఈ హీరో కొన్నాళ్లు ఇండస్ట్రీ నుంచి గ్యాప్ తీసుకుని.. ఇప్పుడు ‘ఎవడే సుబ్రమణ్యం’ ద్వారా తన కెరీర్ ని పరీక్షించుకోబోతున్నాడు. ఇప్పటికే ఈ మూవీకి సంబంధించి విడుదలైన ఫస్ట్ లుక్, ట్రైలర్లకు మంచి స్పందనే లభించింది. ఈ సినిమాతో నాని హిట్ దక్కించుకుంటాడని అందరూ ఆశిస్తున్నారు. అయితే... ఈ సినిమాకు నాని నటించిన మరో సినిమా ‘జెండాపై కపిరాజు’ పెద్ద అడ్డంకిగా మారుతున్నట్లు కనిపిస్తోంది.

వివరాల్లోకి వెళ్తే.. నాని నటించిన తాజా చిత్రం ‘ఎవడే సుబ్రమణ్యం’ మార్చి 20వ తేదీన విడుదలయ్యేందుకు సిద్ధంగా వుంది. అయితే.. ‘జెండాపై కపిరాజు’ మూవీ కూడా ఒక్కరోజు ఆలస్యంగా అంటే మార్చి 21వ తేదీన విడుదల కావడానికి రెడీగా వుంది. నిజానికి ఈ సినిమా గతేడాదే విడుదల అవ్వాల్సి వుండేది కానీ.. కొన్ని ఫైనాన్షియల్ ప్రాబ్లమ్స్ వల్ల నిర్మాతలు వాయిదా వేసుకుంటూ వచ్చారు. పైగా.. ఈ మూవీ తమిళ వెర్షన్ అత్యంత దారుణంగా ఫ్లాప్ కావడంతో తెలుగులోనూ ఎక్కడ ఫ్లాప్ అవుతుందోని నిర్మాత భయపడుతున్నారు. ఇటు ఈ భయం, అటు ఫైనాన్షియల్ ప్రాబ్లమ్స్ తో నిర్మాత ఆ సినిమా విడుదల ఊసే మరిచిపోయారు. ఇప్పుడు సమస్యలన్నీ ఓ కొలిక్కి రావడంతో జెండాను ఎగురవేసేందుకు నిర్మాతలు సన్నాహాలు చేస్తున్నారు. ఈ సినిమాలో నాని మొట్టమొదటిసారిగా డ్యూయల్ రోల్ చేస్తూ, అమలా పాల్, రాగిణి ద్వివేది హీరోయిన్స్ గా నటిస్తున్నారు.

నానికి సంబంధించిన ఈ రెండు సినిమాలు ఒకేసారి విడుదల కావడం బంపరాఫరే అయినప్పటికీ.. అందరూ కాస్త సందేహాల్లో మునిగిపోయారు. ఈ రెండు సినిమాల్లో ఏదోటి ఫ్లాప్ అయినా.. దాని ప్రభావం మరొక మూవీపై పడుతుందోమోనన్న అనుమానాలు వ్యక్తమవుతున్నాయి. ఇప్పటికే తమిళంలో ‘జెండాపై కపిరాజు’ ఫ్లాప్ అయి, నిర్మాతకు నష్టాలు మిగిల్చింది. ఇక తెలుగులోనూ ఫ్లాప్ అవుతుందేమోనని అనుకుంటున్నారు. ఒకవేళ అది ఫ్లాప్ అయితే.. ఆ దెబ్బతో ‘సుబ్రమణ్యం’ కూడా జెండా ఎత్తేయ్యాల్సిందేనని అంటున్నారు. అలాకాకుండా రెండు ఒకేసారి హిట్ అయితే.. నాని కెరీర్ బ్రహ్మాండంగా సాగుతుంది. ఒకవేళ రెండూపోతే.. నాని ఇక కష్టాల్లో మునిగిపోతాడని అభిప్రాయపడుతున్నారు. ఏదేమైనా.. నాని కెరీర్ ఆ రెండు సినిమా పెద్ద సవాళ్లుగా మారాయి. ఆ మూవీలు ఇతనికి ఎటువంటి ఫలితాన్నిస్తాయో వేచి చూడాల్సిందే!