బుల్లితెర ప్రేక్షకులను భయపెట్టించనున్న అంజలి!

Posted: 10/15/2014 09:48 PM IST

Actress anjali geethanjali movie to be telecast on television

‘‘సీతమ్మ వాకిట్లో సిరిమల్లె చెట్టు’’ సినిమాలో సీత పాత్రలో తెలుగు ప్రేక్షకులను ఆకట్టుకున్న అంజలి... ఆ సినిమాతో ఒక్కసారిగా స్టార్ ఇమేజ్ ను తన సొంతం చేసుకుంది. ఆ మూవీ తర్వాత ఈ అమ్మడికి వరుసగా ఆఫర్లు కూడా వచ్చాయి. దీంతో అంజలికి టాలీవుడ్ లో స్టార్ హీరోయిన్ గా ఎదిగేందుకు ఇక ఎదురులేదని అందరూ భావించారు. కానీ ఇంతలోనే కుటుంబ గొడవలతోపాటు తమిళ డైరెక్టర్ కళంజియంతో వివాదాల్లో చిక్కుకున్న నేపథ్యంలో ఈ అమ్మడి స్టార్ ఇమేజ్ ఒక్కసారిగా పడిపోయింది. ఆ వివాదాలకు ముందు ఒప్పుకున్న సినిమాలు మినహా.. మరే ఆఫర్లు ఆమె దరికి చేరలేదు. అయితే ఏదో ఒకవిధంగా ఆ వివాదాల నుంచి బయటపడిన అంజలి... తిరిగి తన స్టార్ డమ్ ను సంపాదించుకోవడానికి ఎన్ని ప్రయత్నాలు చేసినా... చివరికి ఫలితం లేకపోయింది. దీంతో ఈ అమ్మడు వచ్చిన చిన్నచిన్న మూవీ ఆపర్లతోపాటు అప్పుడప్పుడు యాడ్ లలో కనువిందు చేస్తోంది.

అయితే ఇంతలోనే అంజలికి ‘‘గీతాంజలి’’ రూపంలో టాలీవుడ్ లో మళ్లీ సక్సెస్ లభించింది. సినిమా మొత్తంలో అంజలిదే లీడ్ రోల్ కావడంతో ఈ అమ్మడికి ఆ సినిమా ద్వారా మంచి మార్కులే పడ్డాయి. చిన్న సినిమాయే అయినా... మంచి కలెక్షన్లతో ఓ మోస్తరు విజయాన్నే సాధించింది. మళ్లీ సక్సెస్ బాటలోకి తిరిగొచ్చిన ఈ అమ్మడికి అవకాశాలు వస్తాయనే నమ్మకంతో వుంది కానీ... ఇంతవరకు ఏ భారీ మూవీ ఆఫర్ ఆమె దరికి చేరలేదు. దీంతో కోలీవుడ్, కన్నడ పరిశ్రమలో అవకాశాల కోసం చక్కర్లు కొడుతోంది. ఏ చిన్న సినిమాల్లో నటించడానికైనా సై అంటూ చెబుతోంది. ఇదిలావుండగా... తాజాగా ఈ అమ్మడు బుల్లితెర వీక్షకులను భయపెట్టించేందుకు సిద్ధమవుతోందనే వార్తలు టాలీవుడ్ లో చక్కర్లు కొడుతున్నాయి. ఈ నేపథ్యంలోనే ఈ అమ్మడు యాంకరింగ్ గా అవతారమెత్తుతోందా..? లేదా ఏదైనా హారర్ టీవీ సీరియల్ లో క్యారెక్టర్ చేస్తోందా..? అనే అనుమానాలు కూడా వ్యక్తమయ్యాయి. అయితే అలాంటిదేమీ లేదని తేలిపోయింది.

అసలు విషయం ఏమిటంటే.. అంజలి ప్రధాన పాత్రధారిగా ఇటీవల వచ్చిన ‘‘గీతాంజలి’’ చిత్రం హిట్ జాబితాలోకి చేరిపోయిన సంగతి తెలిసిందే! కెరీర్ గాడిలో పడిపోయిందనే సందర్భంలో ఈ మూవీ అంజలికి టర్నింగ్ పాయింట్ గా మారిపోయింది. హారర్, కామెడీ ప్రధానంగా సాగిన ఈ సినిమా ప్రేక్షకుల నుంచి మంచి స్పందనే రాబట్టుకుంది. ఇందులో బ్రహ్మానందం పాత్ర ప్రేక్షకులను బాగానే చక్కిలిగింతలు పెట్టింది. కోన వెంకట్ దీనికి రచన చేయడమే కాకుండా నిర్మాతగా కూడా వ్యవహరించాడు. అయితే ఈ చిత్రాన్ని థియేటర్లో చూడలేకపోయిన వారికి ఇంట్లోనే వీక్షించే అవకాశం త్వరలోనే వచ్చేస్తోందని సమాచారం. ఈనెల 19వ తేదీ సాయంత్రం 6 గంటలకు ‘‘గీతాంజలి’’ చిత్రాన్ని జీటీవీలో తొలిసారిగా ప్రసారం చేయనున్నారు. ఈ సినిమా బాగా హిట్ అవడంతో జీటీవీ ఫ్యాన్సీ రేటుతో దీని హక్కులను సొంతం చేసుకుని, ఇలా ప్రసారం చేస్తోంది.