ఆగడు విడుదల వాయిదా?

Posted: 08/13/2014 10:39 AM IST

ప్రిన్స్ మహేష్ బాబు ఆగడు సినిమా కోసం మరికొంతకాలం ఆగాల్సిందే. ముందుగా అనుకున్నట్లుగా సెప్టెంబర్ నెలలో ఈ సినిమా విడుదల కావటం లేదు.  ప్రస్తుతం చివరి దశ షూటింగ్ జరుగుతోంది. ఈనెల 23 వరకు మహేష్ తమన్నాలపై ఓ పాటను యూరప్ లో షూట్ చేసేలా షెడ్యూల్ ఉంది. కాబట్టి అక్కడి నుంచి సినిమా యూనిట్ వచ్చి, పోస్ట్ ప్రొడక్షన్ మొదలు పెట్టి పూర్తయ్యే సరికి మరో యాబై రోజులు పడుతుంది. అంటే ముందుగా అనుకున్నట్లు సెప్టెంబర్ 19 లేదా 26కు సినిమా ఫస్ట్ కాపి బయటకు రాలేదు. పోస్ట్ ప్రొడక్షన్ ఆలస్యం వల్లే రిలీజ్ ఆగుతున్నట్లు తెలుస్తోంది. దీంతో అక్టోబర్ లో విడుదల చేయాలని సినిమా పెద్దలు బావిస్తున్నారు. మామూలుగా సినిమాలు విడుదలయ్యేది శుక్రవారమే. అక్టోబర్ 3న శుక్రవారం కావటంతో ఆ రోజున సినిమా విడుదల చేయాలని డిసైడ్ అయ్యారట.

అయితే ఆడియో విడుదలలో మాత్రం ఆగడు దూకుడు పెంచి మూడ్రోజుల ముందుకు దూసుకొచ్చింది. మహేష్ కొడుకు గౌతమ్ బర్త్ డే అయిన ఆగస్ట్ 31న ఆడియో విడుదల చేయాలని ప్లాన్ చేశారు. అయితే పలు కారణాలతో ఈనెల 28నే పాటలను విడుదల చేస్తామని చెప్పారు. అభిమానులను దృష్టిలో ఉంచుకుని శిల్పకళా వేదికలో ఆడియో ఫంక్షన్ నిర్వహిస్తున్నారు. మహేష్ తమన్నా హీరో హీరోయిన్లుగా నటిస్తున్న ఈ సినిమాకు శ్రీనువైట్ల దర్శకత్వం వహిస్తున్నాడు. దూకుడు తర్వాత మహేష్-శ్రీను కాంబినేషన్ లో వస్తున్న మూవీ ఇది. ఇందులో కూడా సూపర్ స్టార్ పోలిస్ గెటప్ లో కన్పిస్తాడట. ఇక వైట్ల డైరెక్షన్ కావటంతో కామెడి వెతుక్కోవాల్సిన పని ఉండదని చెప్పాలి. ఓ ఫుల్ టైం ఎంటర్ టైన్ మెంట్ గా సినిమా ఉంటుందని ఇప్పటికే టాక్ వచ్చేసింది. 14 రీల్స్ బ్యానర్ పై వస్తున్న ఈ ఆగడుకు తమన్ సంగీతం అందిస్తున్నాడు.

కార్తిక్