‘సహజీవనం’ బెటర్ అంటున్న లంక బ్యూటీ!

Posted: 02/13/2015 04:19 PM IST

Jacqueline fernandez live in relationship tips unmarried girls

పాశ్చాత్తదేశ సంప్రదాయాలలో ఒకటైన ‘సహజీవనం’ ఇటు దేశంలోని ముఖ్యనగరాల్లోనూ విస్తరించిన విషయం తెలిసిందే! భారతదేశ సంస్కృతికి ఇది విరుద్ధమైనప్పటికీ.. మారిన వాతావరణ పరిస్థితులకు అనుగుణంగా ఇది ఆచరణలోకి వచ్చేసింది. పైగా.. ఇటువంటి సంప్రదాయం మహిళలకు ఎంతో తోడ్పడుతుందంటూ ఇప్పటికే ఎంతోమంది ప్రముఖులు తమ మద్దతు కూడా ప్రకటిస్తున్నారు. పెళ్లికిముందు ఒక వ్యక్తి స్వభావం ఎలా వుంటుందో ఈ రిలేషన్ ద్వారా క్షుణ్ణంగా తెలుసుకోవడానికి వీలుగా వుంటుంది కాబట్టి.. ఇది ఆచరణలో వుండాల్సిందేనంటూ ఎందరో అభిప్రాయం వ్యక్తం చేస్తున్నారు. ఈ కోవలోనే లంకబ్యూటీ జాక్వెలిన్ కూడా చేరిపోయింది.

ఇదే విషయమై జాక్వెలిన్ మాట్లాడుతూ.. ఎదుటివ్యక్తి గురించి పూర్తిగా తెలుసుకోవడానికి ‘సహజీవనం’ ఎంతో ఉపయోగపడుతుందని పేర్కొంటోంది. పెళ్లికిముందు జీవిత భాగస్వామి ఎటువంటివాడో, ఏ విధమైన అలవాట్లను కలిగి వుంటాడో, జీవితాంతం సుఖపెట్టే మనస్తత్వాన్ని కలిగి వుండాడా.? లేదా..? అన్న విషయాలను తెలుసుకోవడానికి ఈ రిలేషన్ తోడ్పడుతుందని అంటోంది. పెళ్లి తర్వాత వచ్చే సమస్యల నుంచి కాపాడుకునేందుకు ఇదే మంచి నిర్ణయమంటూ ఆమె వాపోతోంది. అమ్మాయి తన జీవిత భాగస్వామితో జీవితాంతం సంతోషంగా వుండాలంటే.. అంతకుముందు జీవిత భాగస్వామి గురించి తెలుసుకోవడం ఉత్తమం. అది ఆమె బాధ్యత కూడా! అని ఆమె పేర్కొంటోంది.

అయితే.. సహజీవనం మంచిదేనని చెబుతున్న ఈ భామ.. శృంగారం చేయడం ప్రమాదకరమని హెచ్చరిస్తోంది. ముక్కూముఖం తెలియని కొత్త వ్యక్తితో పరిచయం పెంచుకునేటప్పుడు.. అతనితో శృంగారపర సంబంధాలు పెట్టుకోకూడదని చెబుతోంది. ఎంతటి మంచి వ్యక్తి అయినా సరే.. ఫస్ట్ డేట్’లోనే అతనితో శృంగారంలో పాల్గొనవద్దని చెబుతోంది. అతని గురించి పూర్తి వివరాలు సేకరించిన తర్వాత పూర్తి నమ్మకం కలిగినప్పుడు.. సహజీవనం చేయడంలో ఎలాంటి తప్పు లేదని విశ్లేషిస్తోంది. ఇదిలావుండగా.. ‘కిక్’తో మంచి విజయాన్ని అందుకున్న ఈ లంకబ్యూటీ.. అప్పటినుంచి వరుస ఆఫర్లతో దూసుకుపోతోంది.