అంతా ఆ రింగు మహిమేనా

Posted: 12/16/2014 12:20 PM IST

మిల్కీ బ్యూటి తమన్నాకు అదృష్టం ఎక్కడో తగులుకుంది. లేదంటే, కెరీర్ క్లోజింగ్ స్టేజ్ అని... ఇక సినిమాలు చేయదనుకున్న టైంలో వరుసగా ఆఫర్లు వస్తున్నాయి. చెన్నైలో చేస్తున్న సినిమానే లాస్ట్ అని అంతా అనుకున్నారు. అయితే అనుకోకుండా నాగార్జున సినిమాలో ఛాన్స్ కొట్టేసింది. అక్కడితో ఆగకుండా ఇప్పుడు... ఎన్టీఆర్ మూవీలోనూ నటించనుందని టాక్ విన్పిస్తోంది. ఎన్టీఆర్-సుకుమార్ కాంబినేషన్ లో త్వరలోనే ఓ సినిమా షూటింగ్ ప్రారంభం అవుతుందని గతంలోనే చెప్పటం జరిగింది. ఈ మూవీ కోసం హీరోయిన్ ను ఇప్పటివరకు ఎవర్నీ ఎంపిక చేయలేదు.

రకుల్ ప్రీత్ సింగ్, ఇతర హీరోయిన్ల పేర్లు పరిశీలనలో ఉన్నట్లు తెలిసింది. ఈ లిస్ట్ లో తమన్నా కూడా ఉందని టాక్ విన్పిస్తోంది. అంతేకాదు మిగతావారికంటే తమన్నాకు కాస్త ఎక్కువ అవకాశం ఉన్నట్లు ఫిలింనగర్ నుంచి టాక్ విన్పిస్తోంది. ఎందుకంటే రకుల్ ప్రీత్ సింగ్ ప్రస్తుతం రెండు మూడు సినిమాల్లో నటిస్తూ చాలా బిజీగా ఉంది. ప్రణిత, సమంత లాంటి హీరోయిన్లు కూడా ఇప్పటికిప్పుడు డేట్లు అడ్జస్ట్ చేయాలంటే ఇబ్బందులు పడక తప్పదు. తమన్నా ప్రస్తుతం తమిళంలో ఆర్యతో ఒక సినిమా చేస్తోంది. ఈ మూవీ తర్వాత నాగార్జున-కార్తి మల్టీస్టారర్ లో నటించనుంది. ఈ మూవీ షూటింగ్ షెడ్యూల్ కన్ఫర్మ్ కాకపోవటంతో పాటు..  మిల్కీ బ్యూటికి బయట కూడా పెద్దగా చాన్సులు లేవు. దీంతో అమ్మడికే ఈ ఆఫర్ వస్తుందని గుసగుసలు విన్పిస్తున్నాయి.

ఇక దీనికంతటికి కారణం తమన్నా చేతికి ఉన్న రింగ్ అని ఊహాగానాలు వస్తున్నాయి. కొద్ది రోజుల క్రితం తమన్నా చేతికి ఉన్న ఉంగరం చూసి ఎంగేజ్మెంట్ రింగ్ అనుకున్నారు. అయితే తన తండ్రి గిఫ్ట్ గా ఇచ్చిన డైమండ్ రింగ్ అని బ్యూటి క్లారిటీ ఇచ్చింది. ఆ రింగ్ పెట్టుకోవటం వల్లే ఇప్పుడు ఆఫర్లు వస్తున్నాయి అంటున్నారు. తమన్నా - ఎన్టీఆర్ కాంబినేషన్ లో గతంలో ‘ఊసరవెల్లి’ సినిమా వచ్చింది. ఈ మూవీ కమర్షియల్ గా హిట్ కాకపోయినా.., ఇద్దరి యాక్టింగ్ కు మంచి మార్కులు పడ్డాయి. ఇక ఎన్టీఆర్ విషయానికి వస్తే ఆయన నటిస్తున్న ‘టెంపర్’ మూవీ షూటింగ్ చివరి దశకు చేరుకుంది. సంక్రాంతి కానుకగా సినిమాను విడుదల చేసేందుకు శతవిధాలా ప్రయత్నిస్తున్నారు. ‘రభస’ ఫ్లాప్ కావటంతో.., పూరీ తెరకెక్కించిన ఈ మూవీపై నందమూరి ఫ్యాన్స్ చాలా ఆశలు పెట్టుకున్నారు.

 

కార్తిక్