Posted: 03/28/2012 08:20 PM IST

తమ ప్రేమను పండించుకోవడంలో ఎన్నో అవాంతరాలను ఎదుర్కొని... పెళ్లి పీటల వరకు వచ్చి చివరికి మనస్పర్ధలతో విడిపోయి, ఇప్పుడు తలో దారీ చూసుకున్న ప్రభుదేవా, నయనతార జంటను కలపడానికి ప్రయత్నాలు జరుగుతున్నాయా? ఇప్పుడు కోలీవుడ్ లో ఇదే చర్చ జరుగుతోంది. వీరిద్దర్నీ కలిపే బాధ్యతను వీరి ఉమ్మడి స్నేహితురాలు ఖుష్బూ తీసుకుందని అంటున్నారు. ఈ విషయంలో ఇప్పటికే ఖుష్బూ ఇద్దరితోనూ చర్చలు మొదలుపెట్టిందని తెలుస్తోంది.

త్వరలోనే ఈ సమస్య ఓ కొలిక్కి వచ్చే సూచనలు కనపడుతున్నాయని చెప్పుకుంటున్నారు. ఇదే విషయం ఖుష్బూని అడిగితే మాత్రం, అలాంటిదేమీ లేదనీ, అది వారి వ్యక్తిగత వ్యవహారమనీ చెప్పింది. ఒకవేళ తాను అలాంటి పని చేస్తున్నా, మీడియాకు ఎలా చెబుతానని నవ్వుతూ ఎదురు ప్రశ్న వేసింది. ఈ సమాధానాన్ని బట్టి, ఈ జంటను కలపడానికి లోపాయికారీగా ఏదో జరుగుతోందనే నిర్ణయానికి వస్తున్నారు కోలీవుడ్ జనం!