Posted: 02/22/2012 08:10 PM IST

పాలబుగ్గల సుందరి తమన్నా ఇటు తెలుగు అటు తమిళ భాషల్లో ‘మోస్ట్ వాంటెడ్’ హీరోయిన్‌గా కొనసాగుతున్నారు. ఈ మిల్క్ బ్యూటీకి తమిళనాడులో గుడి కట్టినంత పని చేశారు కొంతమంది అభిమానులు. అందుకే తనకు ‘హ్యాపీడేస్’ రూపంలో బ్రేక్ ఇచ్చిన టాలీవుడ్‌ని ఇష్టపడినట్లుగానే కోలీవుడ్‌ని కూడా ఇష్టపడతారు తమన్నా. అయితే ప్రస్తుతం తమిళంలో తమన్నా సినిమాలు చేయకపోవడం అక్కడి అభిమానులను నిరుత్సాహపరుస్తోందట. గత ఏడాది ‘వేంగై’, ‘సిరుత్తయ్’ చిత్రాల్లో నటించారామె. ఈ చిత్రాల తర్వాత తమన్నా తమిళంలో కొత్త చిత్రాలేవీ కమిట్ కాలేదు.

ఈ నేపథ్యంలో ఆమెకు హిందీలో ఓ అవకాశం వచ్చిందని విని, ఇక తమిళ్ సినిమాలకు తమన్నా దూరమయ్యే అవకాశం ఉందని కోలీవుడ్‌లో ఓ వార్త ప్రచారమవుతోంది. అయితే అలాంటి అవకాశమే లేదని తమన్నా అంటున్నారు. ప్రస్తుతం ఆమె తెలుగులో రచ్చ, ఎందుకంటే ప్రేమంట, రెబల్ చిత్రాల్లో నటిస్తున్నారు. వీటిలో కనీసం రెండు సినిమాలైనా ఏప్రిల్, మే నెలల్లోపు పూర్తవుతాయట. అప్పుడు తమిళ సినిమాల గురించి ఆలోచించాలని తమన్నా ప్లాన్ చేసుకుంటున్నారట. ఇక బాలీవుడ్ విషయానికొస్తే... ఇప్పటివరకు తమన్నాకు నాలుగు హిందీ చిత్రాలకు అవకాశం వచ్చిందట. వాటిలో అజయ్ దేవగన్ సరసన ‘హిమ్మత్‌వాలా’ అనే చిత్రం ఒకటని సమాచారం. అయితే ఈ చిత్రానికి తమన్నా పచ్చజెండా ఊపలేదట. దానికి కారణం డైరీ ఖాళీ లేకపోవడమేనని తెలుస్తోంది. ఒకవేళ ఏమాత్రం వీలు చిక్కినా ముందు ఒక తమిళ సినిమాకి సైన్ చేసి, ఆ తర్వాత హిందీ సినిమా గురించి ఆలోచించాలనుకుంటున్నారట.