Posted: 06/28/2013 10:19 AM IST

మాస్ రాజా ఇమేజ్ నుండి ప్లాపుల రాజాగా పేరు తెచ్చుకున్న హీరో రవితేజ డాన్ శీను, బాడీగార్డ్ వంటి చిత్రాలను తెరకెక్కించిన గోపిచంద్ మలినేని దర్శకత్వంలో ‘బలుపు ’ సినిమాలో నటించాడు. ఈ సినిమా అన్ని పనులు పూర్తి చేసుకొని నేడు ప్రేక్షకుల ముందుకు రాబోతుంది. ఇక రవితేజ విషయానికి వస్తే ఈ సినిమా అతని కెరియర్ ని డిసైడ్ చేయబోతుంది. దీని పై ఎన్నో ఆశలు పెట్టుకొని ఉన్నాడు. గోపీచంద్ మలినేని కూడా ఇంత వరకు చెప్పుకోదగ్గ హిట్టు కొట్టలేదు. రవితేజకు ఎలాగైనా హిట్టు అందించాలనే ఉద్దేశ్యంతో ఈ సినిమాను తీశాడు. ఈ సినిమాకు తమన్ సంగీతం అందించాడు. ట్రైలర్లు ఫర్వాలేదనించే విధంగా ఉన్నాయని టాక్ తెచ్చకున్న ఈ సినిమా ప్రివ్యూ ఏంటో ఓ సారి చూద్దాం.

కథ : ఈ చిత్రంలో రవితేజ పేరు బలుపు శంకర్‌. పాత్ర తీరుకి తగ్గట్టుగా ఈ పేరును పెట్టారు. ప్రేమికురాలికి ఇచ్చిన మాట కోసం హీరో ఏం చేశాడు? వాటి వల్ల ఎదురైన పరిణామాలు ఏమిటన్నది కథలో కీలకాంశం. పక్కా మాస్‌ మసాలా చిత్రమిదని, ప్రేక్షకులు రవితేజ నుంచి వినోదాన్ని... అదే స్థాయి యాక్షన్‌ అంశాలూ ఆశిస్తారు. వాటికి తగ్గ విధంగా బలుపు చిత్రాన్ని తీర్చిదిద్దామని మేకర్స్ చెప్తున్నారు. ఈ మధ్య ఐపీఎల్‌లో బాగా ప్రాచుర్యం పొందిన జంపింగ్‌ జంపాంగ్‌ డాన్స్‌, గంగ్‌నమ్‌... అందర్నీ నవ్విస్తాయి చెబుతున్నారు. ఈ చిత్రంలో డాన్‌లు, మాఫియా ముఠాలు కనిపించవు. ఇది రౌడీయిజం నేపథ్యంగా సాగుతుందని తెలుస్తుంది. ఈ సినిమాలో రవితేజ ఆత్మ రూపంలో కనిపించి అందర్ని నవ్విస్తాడట. ఇక ఈ చిత్రానికి సంబంధించిన రివ్యూని కాసేపట్లో అందిస్తాం.