Posted: 09/15/2012 05:57 PM IST

ఒక మతాన్ని రెచ్చగొట్టిన సినిమా? ఆ సినిమాతో  ప్రపంచ దేశాల్లో  సినిమా చిచ్చు రేగుతుంది.  ప్రపంచ దేశాల్లో ఉన్న ముస్లీలు అందరు కన్నెర్ర చేశారు. ఆ నిమా ప్రపంచ దేశాల్లో కలకలం రేపుతోంది. కల్లోలం సృష్టిస్తోంది. ఇస్లాం మతాన్ని కించపరుస్తూ తీసిన ఆ సినిమాపై ముస్లిం దేశాలు కన్నెర్ర చేశాయి. అమెరికాదే ఈ పాపమంటూ దుమ్మెత్తి పోశాయి. ప్రపంచ వ్యాప్తంగా అమెరికన్ రాయబార కార్యాలయాలను ఆందోళనాకారులు ధ్వంసం చేశారు. నిరసనలతో హోరెత్తించారు. మహమ్మద్ ప్రవక్త  స్త్రీలోలుడనీ, ఆయన శిష్య గణం హంతకులనీ చూపిస్తూ తీసిన 15 నిమిషాల నిడివి కలిగిన ఓ సినిమా గత కొన్ని రోజులుగా యూ ట్యూబ్ లో కనిపిస్తోంది. ఈ సినిమాను ఎవరు, ఎందుకు, ఏ ప్రయోజనాలతో తీసారో తెలీదు. దానిని ఎవరు అప్ లోడ్ చేశారో కూడా తెలీదు. అది అమెరికా గడ్డపై నుంచే అప్ లోడ్ అయిందని తెలుసుకున్న ముస్లిం సోదరులు మరింత ఆగ్రహంతో రగిలిపోయారు. జర్మనీ, బ్రిటన్, ట్యునిస్, ఈజిప్టు, యెమన్, లెబనాన్, పాకిస్థాన్ దేశాలు ఆందోళనలతో అట్టుడికిపోయాయి. సూడన్ లో అమెరికా రాయబార కార్యాలయం ఆందోళనాకారుల దాడులతో దద్దరిల్లింది. ఖర్టుంలోని జర్మన్ ఎంబసీ కూడా నిరసనలకు దగ్ధమైంది. కైరోలో ఆందోళనాకారులపై పోలీసులు టియర్ గ్యాస్ ప్రయోగించారు. దాదాపు 500 మంది నిరసన కారులను అరెస్టు చేశారు. వీధులను ముళ్లకంచెలతో, పోలీసు వాహనాలతో దిగ్బంధించారు.  ఈజిప్టు అధ్యక్షుడు మహమ్మద్ ముర్సీ ఈ సినిమాను వ్యతిరేకించారు. అమెరికా రాయబార కార్యాలయాలముందు ఈజిప్టు ప్రజలు నిరసన ప్రదర్శనలు నిర్వహించారు.

విదేశీ రాయబార కార్యాలయాలకు తగిన రక్షణ కల్పిస్తామంటూనే  ముస్లిం సోదరులను బాధపెట్టే ఇలాంటి సినిమాలు తీయడం తగదని ముర్సి అన్నారు. అటు సూడాన్, అఫ్గానిస్థాన్, యెమన్ లు ఆందోళనలతో అట్టుడికాయి.  లిబియాలోని బెంఘాజీలో అమెరికా కాన్సులేట్ కార్యాలయం అగ్నికి ఆహుతైంది. ఈ దాడుల్లో ముగ్గురు అమెరికా రాయబారులు చనిపోయారు.  ఇక మన దేశంలోనూ నిరసనలు వెల్లువెత్తాయి. చెన్నైలోని అమెరికన్ కాన్సులేట్ కార్యాలయంపై ఆందోళనాకారులు రాళ్ల దాడికి పాల్పడ్డారు. ఆందోళనాకారుల తాకిడికి  కార్యాలయం గాజు అద్దాలు పగిలిపోయాయి. నిరసన కారులను చెదరగొట్టడానికి పోలీసులు లాఠీ చార్జి చేశారు. 25 మందికి స్వల్ప గాయాలయ్యాయి.  వివాదస్పదమైన ఈ సినిమాను ఇంటర్నెట్ లో సైతం వీక్షించకుండా నిషేధించాలని భారత్ భావిస్తోంది. ఈ సినిమా అందుబాటులో దొరికే అన్ని వెబ్ పేజీలను నిషేధించాలంటూ జమ్మూ కశ్మీర్ ప్రభుత్వం చేసిన విన్నపాన్ని హోం శాఖ పరిశీలిస్తోంది. హైదరాబాద్ లోనూ ఈ సినిమాపై నిరసనలు వ్యక్తమయ్యాయి. ఆందోళనాకారులు అమెరికా జాతీయ జెండాను తగుల బెట్టారు.