Posted: 07/13/2012 06:54 PM IST

చిన్నప్పుడు చెరపకురా చెడేవు అని పుస్తకాల్లో బట్టీ పట్టి చదువుకున్నాం. కానీ, మనం చదువుకుంటున్నది ఉద్యోగాల కోసమని ఎప్పుడైతే భావించేమో ఆ ఉద్యోగం వచ్చాక అన్నీ మరిచిపోయాం. అందుకే జ్ఞానం పోతోంది. డబ్బు మదంతో గాలి జనార్దనరెడ్డి తప్పటడుగు వేస్తే… డబ్బు ఆశతో న్యాయమూర్తులో ఆ అడుగుల్లో అడుగులేశారు. ఈరోజు జైళ్లకు వెళ్లింది న్యాయమూర్తులు కాదు, పేదలు నమ్మిన న్యాయం. తొలి విడతలో ఎప్పుడో వైద్యుడి మీద నమ్మకం కోల్పోయిన మనం, మలి విడతలో న్యాయమూర్తిపై నమ్మకం కోల్పోవాల్సి వచ్చింది. ఈ లోకంలో ఇద్దరే అతిముఖ్యమైన వారు. ఒకరు డాక్టరు, మరొకరు న్యాయమూర్తి. ఆ రెండు మనజీవితంలో విపత్కర పరిస్థితుల్లో మాత్రమే గుర్తొచ్చేవి. అక్కడ పొరపాటు జరిగితే జీవితమే ఉండదు.

కానీ, పొరపాటు మొదలైపోయింది. అన్యాయం అక్కడ పాగా వేసేసింది. ఇది పరాకాష్టకు చేరిన కేసు గాలి బెయిలు కుంభకోణం. ఒక్కడు డబ్బు మదంతో చేసిన పని ఈ రోజును వ్యవస్థనే అతలాకుతలం చేసింది. ఈ కేసులో మొత్తం నలుగురు న్యాయమూర్తులు కటకటాల వెనక్కు వెళ్లారు. ఈ కేసులో పలువురిని విచారించిన ఏసీబీ రిమాండ్ రిపోర్టును తయారుచేసింది. అందులో ఏ-1గా ప్రభాకరరావు, ఏ-2గా సూర్యప్రకాష్‌, ఏ-3గా లక్ష్మీనరసింహారావులను పేర్కొంది.పాత్రధారులు, పట్టాభి రామారావు, ప్రభాకరరావు, లక్ష్మీనరసింహారావు. మధ్యవర్తులు, యాదగిరి, పట్టాభి కుమారుడు, ఎమ్మెల్యే సురేష్ బాబు. సూత్రధారులు, కొల్లి లక్ష్మయ్య (గుంటూరు), ఎమ్మెల్యే శ్రీరాములు (కర్ణాటక).