Posted: 06/04/2012 11:21 AM IST

గాలి ముఠాకు సంబంధించిన బెయిల్ ఫర్ సేల్ కుంభకోణంలో  అరెస్టులు ప్రారంభమయ్యే అవకాశాలు కనిపిస్తున్నాయి. సస్పెన్షన్‌లో ఉన్న సీబీఐ కోర్టు జడ్జి పట్టాభి రామారావు, ఆయన కుమారుడు రవిచంద్రతోపాటు తొలి విడతలో మాజీ న్యాయమూర్తి చలపతిరావు, ఆయన సోదరుడు బాలాజీ, రౌడీ షీటర్ యాదగిరిలను సీబీఐ అధికారులు అరెస్టు చేసే అవకాశాలు ఉన్నట్లు సమాచారం. ఈ కుంభకోణంలో చేతులు మారిన డబ్బు బెంగళూరు నుంచే వెళ్లిందని విశ్వసిస్తున్న సీబీఐ అధికారుల బృందం విచారణను మరింత తీవ్రం చేసింది.ఇంతకాలం తమ మాట వినని వాళ్లను ఊళ్లు పట్టించిన గాలి గ్యాంగే ఇప్పడు సీబీఐ దెబ్బకు ఊరు వదలి పరారైంది. గాలి సోదరుడు సోమశేఖర్ రెడ్డి (బళ్లారి ఎమ్మెల్యే), సురేష్ బాబు (కంప్లి ఎమ్మెల్యే), నాగేంద్ర (కూడ్లిగి ఎమ్మెల్యే) అరెస్ట్ భయంతో అజ్ఞాతంలోకి వెళ్లిపోయారని తెలుస్తోంది. ఇక గాలి జనార్ధన్‌రెడ్డికి బెయిలు మంజూరుకు రూ.10 కోట్లను గాలి భార్య లక్ష్మీ అరుణ సర్దినట్లు సీబీఐ అనుమానిస్తోంది. ఆమెను కూడా సీబీఐ ఏ క్షణమైనా విచారణకు పిలవడం లేదా అరెస్టు చేసే అవకాశం ఉన్నట్లు తెలుస్తోంది.

బెయిల్ ఫర్ సేల్ కుంభకోణంలో కర్ణాటక మంత్రి ఒకరికి పాత్ర ఉందని, లేకపోతే ఇంత పెద్ద మొత్తం చేతులు మారడం సాధ్యమే కాదని సీబీఐ వర్గాలు అనుమానిస్తున్నాయి. ఈ నేపథ్యంలో గతంలో గాలికి అత్యంత సన్నిహితులుగా మెలిగిన ఒకరిద్దరు మంత్రులపై కన్నేసినట్లు సమాచారం. దర్యాప్తులో పురోగతిని సాధించామని, మరింత లోతుకు వెళితే సంచలనాలు బయటపడే అవకాశం ఉందని సీబీఐ అధికారి ఒకరు ఆన్‌లైన్‌కు చెప్పారు.ఉప ఎన్నికల ప్రచారంలో భాగంగా అనంతపురం జిల్లా రాయదుర్గం నియోజకవర్గంలో ఇటీవల జగన్ పర్యటించిన సంగతి తెలిసిందే. అప్పట్లో ఆయన వైఎస్ఆర్‌సీపీ అభ్యర్థి కాపు రామచంద్రారెడ్డి ఇంట్లో బస చేశారు. ఈ సందర్భంగా గాలి జనార్దన రెడ్డి భార్య లక్ష్మీ అరుణ జగన్‌ను కలిసి మాట్లాడినట్లు సమాచారం. 'గాలికి బెయిల్ వస్తుందిలే' అంటూ జగన్ ఆమెకు భరోసా ఇచ్చినట్లు విశ్వసనీయ వర్గాలు తెలిపాయి.