Posted: 01/19/2012 04:37 PM IST

బాలయ్య తన బావ సారధ్యంలో .. రాజకీయాల్లోకి దూసుకువస్తున్నాడు. ఒక పక్క సినిమాలు చేస్తునే తన రాజకీయా జీవితానికి పునాదులు వేస్తున్నారు. తెలుగు దేశం పార్టీని ముందు నడిపించడం కోసం బావ తో సహా బాలయ్య పార్టీ విషయాలను సున్నితంగా పరిశీలించటం జరుగుతుందట. మొదటిగా బాలయ్య ఎన్టీఆర్ భవనంలో కొత్త మార్పులు , వాస్తు లోపాలను సరిచేయటంతో బాలయ్య పేరు పార్టీ ఆఫీసులో బాగా వినిపిస్తుందట.

ఇటీవల కాలంలో బాలయ్య చిరంజీవిల మధ్య మాటల యుద్దం జరుతుందని మనకు తెలిసిందే. ప్రజారాజ్యం పార్టీని కాంగ్రెస్‌లో విలీనం చేసిన చిరంజీవి బాగా మాటలు నేర్చారని, ఢిల్లీలో బేరసారాలు చేస్తున్నారని సినీ హీరో నందమూరి బాలకృష్ణ వ్యాఖ్యానించారు. ఎన్టీ రామారావు వర్ధంతి సందర్భంగా బంజారాహిల్స్‌లోని బసవతారకం క్యాన్సర్ ఆసుపత్రిలో తన తల్లిదండ్రులు ఎన్టీఆర్, బసవతారకంల విగ్రహాలకు బాలకృష్ణ పూలమాలలు వేసి నివాళులర్పించారు. చిరంజీవి మీవి పిల్ల చేష్టలని అన్నారన్న విషయాన్ని విలేకరులు ఆయన దృష్టికి తేగా..‘‘పార్టీ పెట్టి కాంగ్రెస్‌లో విలీనం చేసిన తరువాత పీఆర్పీ అధినేత చిరంజీవి చాలా పెద్దవాడైపోయాడు. బాగా మాటలు నేర్చాడు. అందుకేగా ఢిల్లీలో జోరుగా బేరసారాలు చేస్తున్నాడు’’ అంటూ వ్యంగ్యాస్త్రాలు విసిరారు.

ఎంపీగా పోటీ చేస్తారని వస్తున్న వార్తలను బాలకృష్ణ కొట్టిపారేశారు. వచ్చే సాధారణ ఎన్నికల్లో తాను అసెంబ్లీకే పోటీ చేస్తానని స్పష్టం చేశారు. తెలంగాణ, రాయలసీమ, కోస్తా ప్రాంతాల్లో ఎక్కడి నుంచి పోటీ చేయమని పార్టీ అదేశిస్తే అక్కడి నుంచి పోటీకి సిద్ధమన్నారు. తాను పోటీ చేసిన నియోజకవర్గంలో ప్రచారానికి సోదరుడు హరికృష్ణ వస్తే సంతోషమేనని చెప్పారు. తమ్ముడి విజయం కోసం అన్న పాటుపడటం సంతోషించ దగ్గ విషయమే కదా అని అన్నారు. తన సోదరి దగ్గుబాటి పురందేశ్వరి, బావ దగ్గుబాటి వెంకటేశ్వరరావు టీడీపీలోకి వస్తే ఆహ్వానిస్తామని, అయితే వారిని రమ్మని మాత్రం అడిగేదిలేదని స్పష్టం చేశారు. జూనియర్ ఎన్టీఆర్, హరికృష్ణ కొద్ది రోజులుగా పార్టీకి దూరంగా ఉంటున్న విషయాన్ని విలేకరులు ప్రస్తావించగా.. అది వారి వ్యక్తిగత విషయమన్నారు.