రామ్ చరణ్-శంకర్ సినిమాకు టైటిల్ ఇదేనా.?

Posted: 05/27/2022 08:09 PM IST

Shankar and ram charan s film will be named adhikari

మెగా పవర్ స్టార్ రామ్ చరణ్ హీరోగా శంకర్ దర్శకత్వంలో రూపోందుతున్న చిత్రానికి పవర్ ఫుల్ టైటిల్ ను అనుకుంటున్నారన్న ఊహాగానాలు చిత్రపురిలో వినిపిస్తున్నాయి. ఈ సినిమాతో తెలుగులో నేరుగా చిత్రాన్ని రూపొందిస్తున్న శంకర్ పరిశీలనలో పాత చిత్ర టైటిల్ ఉందన్న గుసగుసలు షికార్లు కొడుతున్నాయి. భారీ బడ్జెట్ తో దిల్ రాజు నిర్మిస్తున్న ఈ సినిమా చకచకా షూటింగు జరుపుకుంటోంది. ఇటీవలే వైజాగ్ షెడ్యూల్ ను పూర్తి చేశారు. వచ్చేనెల 2వ వారం నుంచి హైదరాబాద్ లో మరో షెడ్యూల్ ను మొదలెట్టనున్నట్టు చెబుతున్నారు. అందుకు సంబంధించిన సన్నాహాలు జరుగుతున్నాయి.

ఈ సినిమా కోసం మూడు టైటిల్స్ ను పరిశీలిస్తున్నట్టుగా వార్తలు వచ్చాయి. వాటిలో 'అధికారి' అనే టైటిల్ ను ఖరారు చేయనున్నట్టు సమాచారం. చరణ్ ఐఏఎస్ ఆఫీసర్ గా కనిపించనున్నాడు కనుక, 'అధికారి' టైటిల్ కరెక్టుగా సెట్ అవుతుందని అంటున్నారు. టైటిల్ పవర్ఫుల్ గా ఉండటంతో దాదాపు ఖాయమైనట్టే అని చెబుతున్నారు. ఈ సినిమాలో చరణ్ సరసన నాయికగా కియారా అద్వాని అలరించనుంది. ముఖ్యమైన పాత్రలలో శ్రీకాంత్ .. సునీల్ .. అంజలి కనిపించనున్నారు. తమన్ ఈ సినిమాకి సంగీతాన్ని అందించాడు.

ఆయన పాటలు ఈ సినిమాకి హైలైట్ గా నిలవనున్నట్టు చెబుతున్నారు. పాటల చిత్రీకరణ కోసం కూడా భారీ స్థాయిలో ఖర్చు చేయనున్నట్టు టాక్. ఈ సినిమాలో తన పాత్రను శంకర్ డిజైన్ చేసిన తీరు చాలా కొత్తగా ఉంటుందనీ, ఇది మామూలుగా వుండదనీ, ఈ పాత్ర తన కెరియర్లో ప్రత్యేకమైన స్థానంలో నిలిచిపోతుందని సునీల్ చెబుతున్నాడు. చరణ్ పాత్ర వెంటనే ఉంటూ ఈ సినిమా మొత్తం తాను కనిపిస్తాననీ, తన పాత్రను గురించి చాలా రోజులు మాట్లాడుకుంటారని ఆయన చెప్పుకొచ్చాడు.