సుమంత్ వెడ్డింగ్ కార్డు వైరల్.. అర్జీవి రియాక్షన్

Posted: 07/28/2021 05:52 PM IST

టాలీవుడ్ లో మ‌రో హీరో పెళ్లిపీట‌లు ఎక్క‌బోతున్నాడు. అక్కినేని నాగేశ్వర్ రావు పెద్ద మ‌నుమ‌డు సుమంత్ ఇప్పుడు రెండో పెళ్లికి సిద్ధ‌మ‌య్యాడు. త‌మ కుటుంబానికి అత్యంత స‌న్నిహితురాలైన ప‌విత్ర అనే అమ్మాయిని పెళ్లి చేసుకోబోతున్నాడు. క‌రోనా నేప‌థ్యంలో ఇరు కుటుంబ పెద్ద‌లు, అత్యంత స‌న్నిహితుల మ‌ధ్య ఈ వివాహం జ‌రుగ‌నున్న‌ట్టు తెలుస్తోంది. ఈ మేర‌కు సుమంత్‌, ప‌విత్రల వెడ్డింగ్ కార్డు నెట్టింట వైర‌ల్ అవుతోంది.

సుమంత్ కుమార్ వెడ్స్ ప‌విత్ర వివాహానికి ఇదే మా ఆహ్వానం అంటూ ఆ శుభ‌లేఖ సోష‌ల్ మీడియాలో చ‌క్క‌ర్లు కొడుతోంది. ఈ కార్డులో SP అనే అక్ష‌రాల‌ను హైలైట్ చేస్తూ తీర్చిదిద్దారు. అయితే ఈ ఇన్విటేష‌న్ కార్డులో పెళ్లి తేదీ, వివాహ వేదిక వంటి వివ‌రాలు లేక‌పోవ‌డంతో సుమంత్ పెళ్లిపై కొద్దిగా సస్పెన్స్ నెల‌కొంది. సుమంత్‌కు 2004లో న‌టి కీర్తిరెడ్డితో వివాహం జ‌రిగింది. ఈమె ప‌వ‌న్ క‌ళ్యాణ్ హీరోగా వ‌చ్చిన తొలి ప్రేమ సినిమాతో టాలీవుడ్ ప్రేక్ష‌కుల‌కు ద‌గ్గ‌రైంది. అయితే ఇద్ద‌రి మ‌ధ్య మ‌న‌స్ప‌ర్థ‌లు రావ‌డంతో రెండేళ్ల‌లోపే విడాకులు తీసుకున్నారు.

ఆ త‌ర్వాత కీర్తి రెడ్డి రెండో పెళ్లి చేసుకుని అమెరికాలో సెటిల్ అయింది. కానీ సుమంత్ మాత్రం సింగిల్‌గా ఉన్నాడు. ఈ క్ర‌మంలో సుమంత్ రెండో పెళ్లి చేసుకోబోతున్నాడ‌ని గ‌త కొద్ది రోజులుగా వార్త‌లు వ‌స్తున్నాయి. ఈ నేప‌థ్యంలోనే ఇప్పుడు సుమంత్ పెళ్లి కార్డు నెట్టింట వైర‌ల్‌గా మారింది. అక్కినేని నాగేశ్వ‌రరావు మ‌నుమ‌డిగా ప్రేమ‌క‌థ చిత్రంతో తెలుగు తెర‌కు ప‌రిచ‌య‌మ‌య్యాడు సుమంత్‌. ఆ త‌ర్వాత స‌త్యం, గోదావ‌రి, గోల్కొండ హైస్కూల్‌, మ‌ళ్లీ రావా వంటి చిత్రాల‌తో న‌టుడిగా గుర్తింపు తెచ్చుకున్నాడు. ప్ర‌స్తుతం సుమంత్ అన‌గ‌న‌గా ఒక రౌడీ చిత్రంలో న‌టిస్తున్నాడు.

వీరి పెళ్లిపత్రిక ఇప్పుడు సోషల్ మీడియాలో వైరల్ గా మారడంతో ముక్కుసూటిగా మాట్లాడే వివాదాస్పద దర్శకుడు రామ్ గోపాల్ వర్మ కూడా తనదైన శైలిలో స్పందించారు. సుమంత్ తో ఉన్న సన్నిహిత్యంతో ఆయన 'ఒక సారి అయ్యాక కూడా నీకింకా బుద్ధి రాలేదా సుమంత్? నీ ఖర్మ, ఆ పవిత్ర ఖర్మ. అనుభవించండి' అని ట్వీట్ చేశాడు.