ఎఫ్-3 తో నాగ పంచమికి తోడలుళ్ల సందడి..

Posted: 01/28/2021 09:47 PM IST

F3 confirms its release date venkatesh and tamannaah starrer sets to arrive

సీనియర్ హీరో విక్టరీ వెంకటేశ్, మెగా ప్రిన్స్ వరుణ్ తేజ్ కాంబినేషన్ లో వచ్చిన ఎఫ్2 తెలుగు ప్రేక్షకులను నవ్వుల పువ్వులు పూయించింది. ఈ చిత్రం ఎంతటి ఘన విజయాన్ని అందుకుందో అందరికీ తెలిసిందే. అంతేకాదు ఇటు బుల్లితెరపై ప్రసారమైన సందర్భంలోనూ ప్రేక్షకులను కడుపుబ్బా నవ్వించింది, దిల్ రాజు బ్యానర్ పై యువ దర్శకుడు అనిల్ రావిపూడి తెరకెక్కించిన ఈ చిత్రం సీక్వెల్ ప్రస్తుతం తెరకెక్కుతోంది. చిత్రం పూర్తి నిడివి కామెడీ ఇతివృత్తంగానే రూపోందుతున్న ఎప్ 3 లో వెంకటేష్, వరుణ్ తేజ్ హీరోలుగా నటిస్తున్నారు.

ఇక తాజాగా ఈ సినిమా విడుదల తేదీని చిత్రబృందం ప్రకటించింది. ఆగస్టు 27న ఎఫ్3 ప్రేక్షకుల ముందుకు వస్తుందని తెలిపింది. ఎప్ 2 చిత్రం సంక్రాంతి బరిలో నిలిచి బంపర్ హిట్ కొట్టగా ఎఫ్ 3 చిత్రం సరిగ్గా నాగుల పంచమి రోజున ప్రేక్షకుల ముందుకు రానుంది. దాదాపు ఎఫ్2 చిత్రానికి పనిచేసిన వారే ఈ సీక్వెల్ కు కూడా పనిచేస్తున్నట్టు తెలిసింది. లాక్ డౌన్ సమయంలో పక్కాగా స్ట్రిప్టు సిద్ధం చేసుకున్న అనిల్ రావిపూడి శరవేగంతో షూటింగ్ జరుపుతున్నారు. కాగా ఈ సినిమాలో వెంకటేశ్, వరుణ్ తేజ్ లతో పాటు సునీల్ కూడా నవ్విస్తాడని తెలుస్తోంది. ఇక ఎఫ్2లో కథానాయికలుగా అలరించిన తమన్నా, మెహ్రీన్ లే ఇందులోనూ మురిపించనున్నారు.