ఆకట్టుకుంటున్న 'సాఫ్ట్ వేర్ సుధీర్' ట్రైలర్

Posted: 11/27/2019 07:03 PM IST

'జబర్దస్త్' కామెడీ షో ద్వారా పాప్యులర్ అయిన ఆర్టిస్టులలో 'సుడిగాలి' సుధీర్ ఒకరు. ఒకప్పుడు ఆయన స్కిట్ చూసేందుకే ప్రేక్షకులు ఎంతో ఆసక్తిగా ఎదురుచూసేవారంటే అతిశయోక్తి కాదు. బుల్లి తెర నుంచి వెండితెరకు నటులు వెళ్తున్న తరుణంలో బిత్తిరి సత్తి తరువాత క్యూ కడుతూ వెళ్తున్న మరో నటుడు.. సుడిగాలి సుధీర్. ఇప్పటి వరకు ఎవఇంతవరకూ సినిమాల్లో చిన్న చిన్న పాత్రలను పోషిస్తూ వచ్చిన సుధీర్, ఇప్పుడు హీరో అయ్యాడు.

తన అదృష్టాన్ని సిల్వర్ స్ర్కీన్ పై పరీక్షించుకోనున్నాడు. బుల్లితెరపై తనను ఆదరించిన ప్రేక్షకులు వెండితెరపై కూడా ఆశీర్వదిస్తారని కొండంత ఆశగా ఎదురుచూస్తూ త్వరలోనే ప్రేక్షకుల ముందుకు వెళ్లనున్నాడు. ఆయన హీరోగా 'సాఫ్ట్ వేర్ సుధీర్' సినిమా నిర్మితమైంది. శేఖర్ రాజు నిర్మించిన ఈ సినిమాకి రాజశేఖర్ రెడ్డి దర్శకుడిగా వ్యవహరించాడు.

ధన్యాబాలకృష్ణ కథానాయికగా నటించిన ఈ సినిమా నుంచి ట్రైలర్ ను రిలీజ్ చేశారు. లవ్ .. యాక్షన్ .. ఎమోషన్ .. కామెడీ సన్నివేశాలపై కట్ చేసిన ఈ ట్రైలర్ ఆకట్టుకుంటోంది. సుధీర్ తన మార్కు కామెడీతో బాగానే నవ్వించనున్నాడనే విషయం ఈ ట్రైలర్ ను బట్టి తెలుస్తోంది. ఇంద్రజ .. నాజర్ .. సాయాజీ షిండే .. పోసాని .. పృథ్వీ .. తాగుబోతు రమేశ్ .. విద్యుల్లేఖ రామన్ ముఖ్యమైన పాత్రల్లో కనిపించనున్నారు. త్వరలోనే ఈ సినిమా ప్రేక్షకుల ముందుకు రానుంది.