ఆసక్తి రేపుతున్న రజనీ ‘దర్బార్’ స్టైలిష్ లుక్....

Posted: 11/07/2019 09:24 PM IST

‘సూపర్‌స్టార్‌’ రజనీకాంత్‌ కథానాయకుడిగా తెరకెక్కుతున్న యాక్షన్‌ ఎంటర్‌టైనర్‌ ‘దర్బార్‌’. ఏఆర్‌ మురుగదాస్‌ దర్శకత్వం వహిస్తున్నారు. శరవేగంగా చిత్రీకరణ జరుపుకొంటున్న ఈ సినిమాకు వచ్చే ఏడాది సంక్రాంతికి ప్రేక్షకుల ముందుకు రానుంది. ఈ సందర్భంగా చిత్రంలోని రజనీకాంత్‌ కొత్త లుక్‌ మోషన్‌ పోస్టర్‌ను అగ్ర కథానాయకుడు మహేశ్‌బాబు విడుదల చేశారు. ఈ చిత్రంలో సూపర్ స్టార్ పోలీసు పాత్రలో మెరువనున్నట్లు తెలుస్తోంది. కాగా చాలాకాలం తరువాత రజనీకాంత్ పోలీసు యూనిఫాంలో తనదైన స్టైలిష్ లుక్ లో మెరిసారు.

మోషన్ పోస్టర్ విడుదల సందర్భంగా అగ్రకథానాయకుడు మహేష్ బాబు తన సంతోషాన్ని అభిమానులతో పంచుకున్నారు. రజనీకాంత్ పై ఎప్పటికీ ప్రేమ, గౌరవం అలానే ఉంటాయన్నారు. దర్శకుడు ఏఆర్‌ మురుగదాస్‌ సహా చిత్ర బృందానికి తన శుభాకాంక్షలు తెలిపారు. దర్బార్‌’లో రజనీకాంత్‌ ఆదిత్య అరుణాచలం అనే పోలీస్‌ ఆఫీసర్ గా కనిపించనున్నారు. ఆయనకు జోడీగా నయనతార నటిస్తున్నారు. నివేదా థామస్‌, సునీల్‌ శెట్టి, యోగిబాబు, సిమ్రన్‌ తదితరులు కీలక పాత్రలు పోషిస్తున్నారు. అనిరుధ్‌ రవిచందర్‌ స్వరాలు సమకూరుస్తున్నారు. లైకా ప్రొడక్షన్స్‌ బ్యానర్‌పై శుభాష్‌కరణ్‌ నిర్మిస్తున్నారు.