తారక్ చేతుల మీదుగా విశ్వరూపం-2 ట్రైలర్

Posted: 06/11/2018 07:05 PM IST

Kamal haasan s vishwaroopam 2 gets a release date

కమలహాసన్ కథానాయకుడిగా కొంతకాలం క్రితం వచ్చిన 'విశ్వరూపం' .. అప్పట్లో భారీ విజయాన్ని సొంతం చేసుకుంది. దాంతో ఆ సినిమాకి కొనసాగింపుగా కమల్ 'విశ్వరూపం 2' సినిమాను రూపొందించాడు. అయితే ఆర్ధిక పరమైన కొన్ని కారణాల వలన ఈ సినిమా విడుదల విషయంలో జాప్యం జరుగుతూ వచ్చింది. ఈ సినిమా విడుదల విషయంలో అడ్డంకిగా వున్న సమస్యలను పరిష్కరించుకున్న కమల్ .. విడుదలకి సన్నాహాలు చేస్తున్నాడు. ఈ చిత్రాన్ని అగస్టు మాసం 10వ తేదిన విడుదల చేసేందుకు సన్నాహాలు చేస్తున్నారు.

ఈ మేరకు కమల్ హాసన్ కు చెందిన నిర్మాణ సంస్థ రాజ్ కమల్ ఫిల్మ్స్ ఇంటర్ నేషనల్ వెల్లడించింది. త్రిబాషాలలో ఈ చిత్రం విడుదలకు భారీస్థాయిలో ఏర్పాటు చేస్తున్నట్లు తెలిపింది. హిందీ బాషలో తన విశ్వరూపం 2 ట్రైలర్ ను ప్రముఖ నటుడు అమీర్ ఖాన్ విడుదల చేయగా, ఇక తెలుగులో జూనియర్ ఎన్టీఆర్ (తారక్) విడుదల చేశారు. ఇక తమిళంలో ఆయన పెద్ద కూతురు నటి, మ్యూజీషియన్ శృతి హసన్ ట్రైలర్ ను విడుదల చేశారు.

ప్రధాన పాత్రలను కవర్ చేస్తూ ఈ ట్రైలర్ ను కట్ చేశారు. యాక్షన్ .. ఎమోషన్ .. రొమాంటిక్ సీన్స్ పై కట్ చేసిన ఈ ట్రైలర్ ఆసక్తిని రేకెత్తించేదిలా వుంది. భారీ తనాన్ని ఈ ట్రైలర్ ప్రతిబింబిస్తూ .. కమల్ నట విశ్వరూపం ఈ సినిమాతో మరోమారు ఆవిష్కృతం కానుందనే విషయాన్ని స్పష్టం చేస్తోంది. ఇక కమల్ అభిమానులు కూడా ఈ సినిమాపై భారీ అశలనే పెట్టుకున్నారు.