కమిట్ మెంట్ చూపిన జాన్వీ కపూర్

Posted: 03/09/2018 10:03 AM IST

లెజెండరీ నటి శ్రీదేవి వారసురాలిగా జాన్వీ కపూర్ త్వరలో బాలీవుడ్ కు పరిచయం కాబోతోంది. తన తొలి చిత్రం 'ధడక్'(మరాఠీ బ్లాక్ బస్టర్ సైరాట్ రీమేక్) షూటింగ్ లో పాల్గొంటోంది. ఇంతలోనే శ్రీదేవి హఠాన్మరణం ఆ కుటుంబాన్ని కుంగదీసింది. ఇక పుట్టెడు శోకంలో కూడా జాన్వీ తన కమిట్ మెంట్ ను చూపింది. అనుకున్న టైంకి సినిమా రిలీజ్ కావాలనుకుంది. అందుకే ధడక్ షూటింగ్ కు హాజరైంది.

బాధను మనసులోనే దిగమింగిన జాన్వీ, సినిమా షూటింగ్ లో జాయిన్ కాగా, చేసే పనిపై జాన్వీ కమిట్ మెంట్ ను మెచ్చుకుంటూ నిర్మాతలు ఓ ప్రకటన విడుదల చేశారు. రెండు రోజుల క్రితం తన 21వ పుట్టిన రోజును జరుపుకున్న జాన్వీ, ఇప్పుడు సినిమా కోసం పూర్తిగా సహకరిస్తానని చెప్పటం ప్రశంసనీయమే. అయితే ఈ రెండింటిపైనా సోషల్ మీడియాలో విమర్శలు చేస్తున్న వాళ్లు లేకపోలేదు.

కాగా, 'ధడక్' ప్రస్తుత షెడ్యూల్ లో భాగంగా బాంద్రా ప్రాంతంలో జాన్వీ, ఈషాన్ ల మధ్య కొన్ని కీలక సన్నివేశాలను చిత్రీకరిస్తున్నారు. వచ్చే వారం నుంచి వీరిద్దరూ కోల్ కతాలో జరిగే షూటింగ్ లో పాల్గొంటారని తెలుస్తోంది. ఇంటర్వెల్ తరువాత కనిపించే హైదరాబాద్ దృశ్యాలు... హిందీలో కోల్ కతా నగరంలో షూట్ చేయనున్నట్లు సమాచారం. శశాంక్ కైతన్ దర్శకత్వం వహిస్తున్న ఈ చిత్రం జూలై 20న ధడక్ ప్రేక్షకుల ముందుకు రానుంది.