నితిన్ తో రిలేషన్ పై మేఘా ఆకాశ్ క్లారిటీ

Posted: 11/01/2017 12:40 PM IST

తమిళ్ నటి మేఘ ఆకాశ్ తెలుగు తెరకు 'లై' సినిమా ద్వారా కథానాయికగా పరిచయమైంది. ఆ తరువాత సినిమాను కూడా ఆమె నితిన్ జోడీగానే చేస్తోంది. మధ్యలో ఉన్నది ఒకటే జిందగీ లాంటి చిత్రం నుంచి తప్పుకున్న మేఘ తర్వాత మరో రెండు సినిమాల నుంచి కూడా తప్పుకుందనే వార్తలు ఆ మధ్య వినిపించాయి. అయితే కేవలం నితిన్ కోసమే ఆ సినిమాలను వదిలేసుకుందన్న ఓ పుకారు అప్పుడు వినిపించింది.

ఈ వార్తలన్నింటిని కూర్చి నితిన్ - మేఘ ఆకాశ్ ప్రేమలో పడ్డారనీ .. పెళ్లి చేసుకోవాలనుకుంటున్నారనే ప్రచారం జోరందుకుంది. ఈ ప్రచారం అంతకంతకూ బలపడుతూ ఉండటంతో చివరకు మేఘ ఆకాశ్ స్పందించింది. 'లై' సినిమాకి కొత్త కథానాయిక కావాలనుకుంటున్నప్పుడు తన పేరును నితిన్ సిఫార్స్ చేయడం వలన, కొంతమంది ఇలా ప్రచారం చేస్తున్నారని చెప్పింది. తాము ప్రేమలో పడినట్టుగా .. పెళ్లి చేసుకోవాలనుకుంటున్నట్టుగా వస్తోన్న వార్తల్లో ఎంతమాత్రం నిజం లేదని అంది.

తాను నితిన్ సినిమాలను మాత్రమే చేస్తానంటూ పుకార్లు పుట్టుకొస్తున్నాయంటూ ఆవేదన వ్యక్తం చేసింది. ఈ చిత్ర నిర్మాతలు లై సమయంలోనే తనని అప్రోచ్ అయ్యారని.. డేట్లు అడ్జస్ట్ చేయాలని కోరటంతో ఈ చిత్రాన్ని అంగీకరించానని వెల్లడించింది. తనకి నితిన్ మంచి స్నేహితుడనీ .. అంతకుమించి ఏమీ లేదనీ, ఇలాంటి ప్రచారాలు మానుకోవడం మంచిదంటూ గట్టిగానే చెప్పింది.