ఎంజీఆర్ బయోపిక్.. లీడ్ రోల్ లో సత్యరాజ్?

Posted: 10/24/2017 06:16 PM IST

బయోపిక్ ల సంగతి మాటేమోగానీ వివాదాలు కూడా అదే స్థాయిలో వెలుగులోకి తెస్తూ పలువురు వార్తల్లో నిలుస్తున్నారు. వర్మ లక్ష్మీస్ ఎన్టీఆర్ చిత్ర సంగతి ఏమోగానీ.. కోలీవుడ్ లో మాత్రం ఓ బయోపిక్ ప్రకటన ఇప్పుడు చర్చనీయాంశంగా మారింది. పురుచ్చితలైవా ఎంజీ రామచంద్రన్ జీవిత గాథన్ని సిల్వర్ స్క్రీన్ పై చూపించేందుకు రంగం సిద్ధం అయ్యింది.

మణ కమ్యూనికేషన్స్ వారు బాలకృష్ణన్ దర్శకత్వంలో ఈ సినిమాను నిర్మించడానికిగాను రంగంలోకి దిగారు. ఎంజీఆర్ పాత్రను పోషించడం అంత తేలికైన పనికాదు. ఆ పాత్రలో మెప్పించడం అంత ఆషామాషీ వ్యవహారమూ కాదు. అందువలన బాగా ఆలోచించి .. ఈ పాత్రకి సత్యరాజ్ అయితే కరెక్ట్ గా సరిపోతారని యూనిట్ సభ్యులు భావిస్తున్నారట. కోలీవుడ్ ఇండస్ట్రీలోనూ ఇదే అభిప్రాయం వ్యక్తమవుతోంది.

సినిమా హీరోగానే కాదు.. రాజకీయ నాయకుడిగా, ముఖ్యమంత్రిగా ఎంజీఆర్ తమిళనాట ఎంతో ప్రభావం చూపారు. లక్షలాది మంది అభిమానుల మనసులు గెలుచుకున్నారు .. వ్యక్తిత్వం విషయంలో ఎంతో మందికి ఆదర్శంగా నిలిచారు. అలాంటి ఎంజీఆర్ బయోపిక్ ను తెరకెక్కించడానికి ప్రయత్నాలు మొదలయ్యాయి. నవంబర్ 8వ తేదీన పలువురు మంత్రుల సమక్షంలో తమిళనాడు సీఎం పళని క్లాప్ తో సినిమా మొదలవ్వబోతుందని చెబుతున్నారు.