రేషన్ కార్డు మీద కాజల్ ఫోటో

Posted: 09/13/2017 02:21 PM IST

అధికారుల తప్పిదాలు ఎంత ఘోరంగా ఉంటాయో తెలియజేసే ఘటన ఒకటి తమిళనాడు రాష్ట్రంలో చోటు చేసుకుంది. గతంలో జారీ చేసిన రేషన్ కార్డుల స్థానంలో ఇప్పుడు కొత్తగా స్మార్ట్ కార్డులను పంపిణీ చేస్తున్నారు. సంబంధిత అధికారులు లబ్ధిదారులకు స్మార్ట్‌ కార్డులను జారీ చేసే పనిలో బిజీగా ఉన్నారు. సేలంకు చెందిన సరోజా కుటుంబం పెద్ద కావటంతో ఆమె పేరు మీద కార్డు జారీ అయ్యింది.

ఇంటికొచ్చిన కార్డను చూసుకున్న ఆమె ఒక్కసారిగా షాక్ కి గురయ్యింది. త‌న ఫొటో ఉండాల్సిన చోట హీరోయిన్ కాజల్ అగర్వాల్ ఫొటో ఉండ‌డంతో కంగుతింది. వెంటనే విష‌యాన్ని అధికారుల దృష్టికి తీసుకెళ్లగా.. నాలుక కరుచుకున్న అధికారులు మరో కార్డును ఆమెకు జారీ చేశారు. ఒక్క ఆమె కార్డులోనే కాదు.. చాలా మంది ల‌బ్ధిదారుల‌ కార్డుల్లోనూ ఇలాగే హీరో, హీరోయిన్లు ఫోటోలతో, పేర్లలో తప్పులతో కార్డులు జారీ అయ్యాయని సమాచారం.

కొన్ని న‌గ‌రాల్లో స్మార్ట్ కార్డుల్లో నటులతో పాటు చెట్లు, జంతువుల ఫోటోలు కూడా జారీ అయినట్లు చెబుతున్నారు. దీనిపై పీఎంకే నేత డాక్టర్ రామ్ దాస్ తీవ్రంగా మండిపడుతున్నారు. అధికారులు ఎంత నిర్లక్ష్యంగా ఉన్నారో అంటూ విమర్శలు గుప్పిస్తున్నారు.