పవన్ మ్యూజిక్ బిట్ మీదే అందరి దృష్టి

Posted: 09/07/2017 05:50 PM IST

ఓ చిత్ర విజయంలో మ్యూజిక్ ఎంత కీలక పాత్ర పోషిస్తుందో ప్రత్యేకంగా చెప్పనక్కర్లేదు. ఒకటి రెండు హిట్ ట్రాక్స్ ఉన్నా.. కనీసం యావరేజ్ పాటలున్నా సరే కథ బలంగా ఉంటే చిత్రం హిట్ అయి తీరుతున్న రోజులివి. అయితే కథ బాగోలేకపోయినా జస్ట్ పాటలతో మ్యూజిక్ హిట్లుగా మారిన సినిమాలు ఉన్న సంగతి మరిచిపోవద్దు. అయితే త్వరలో రానున్న స్టార్ సినిమాల్లో వీక్ పాటలు ఆయా హీరోల ఫ్యాన్స్ ను కలవరపాటుకు గురిచేస్తున్నాయి.

అందులో మొదటగా జూనియర్ ఎన్టీఆర్ జై లవకుశ గురించి చెప్పుకోవాలి. మాములుగా ఎమోషనల్ బ్యాగ్రౌండ్ స్కోర్ లకు, టైటిల్ సాంగ్ లకు మ్యూజిక్ అందించటంలో దేవీశ్రీ ప్రసాద్ ఆరితేరి ఉన్నాడు. జై క్యారెక్టర్ టీజర్ సమయంలో ఆ ఫ్లస్ పాయింట్ మ్యూజిక్ ఆల్బమ్ పై అంచనాలు పెంచింది. పైగా ఇద్దరి కాంబోలో వచ్చిన లాస్ట్ టూ సినిమాల పాటలు కూడా అదే రేంజ్ లో హిట్ అయ్యాయి. అయితే ఇప్పడు లవకుశ విషయానికొచ్చే సరికి ఆ అంచనాలు తలకిందులయ్యాయి. ఒక్క టైటిల్ సాంగ్(అది కూడా దేవీ పాత పాటల్లాగే ఉందన్న కంప్లైంట్ ఉంది) మిగతా పాటలేవీ పెద్దగా రిజిస్ట్రర్ కాలేకపోయాయి. దీంతో సినిమాపై ఈ ఎఫెక్ట్ పడే అవకాశం స్పష్టంగా కనిపిస్తుంది.

ఇక రెండోది మహేష్ బాబు స్పైడర్ చిత్రం. ఇప్పటికే సగం తమిళ సినిమా మార్క్ పడ్డప్పటికీ కనీసం పాటలతోనైనా హ్యారిస్ జైరాజ్ సర్దిపుచ్చుతాడనుకుంటే అదీ కాలేదు. పైగా రిలీజ్ అయిన రెండు పాటలు కూడా అరవ వాసనతోనే ట్రెండ్ అవుతున్నాయి. పోనీ.. తమిళ్ లో అయినా హిట్ అయ్యాయా? అంటే అక్కడి జనాలకు అస్సలు ఎక్కలేదు. అసలే భారీ బడ్జెట్ తో రూపొందిన చిత్రం.. పైగా ఏడాదిన్నర కష్టం... ఈ నేపథ్యంలో మహేష్ అభిమానుల్లోనూ చిన్న కలవరపాటు మొదలైంది.

అయితే ఈ చిత్రాలకు కాస్త గ్యాప్ తోనే రిలీజ్ కానుకున్న పవన్ కళ్యాణ్ 25వ చిత్రం మాత్రం చిన్న బీట్ తోనే అంచనాలను అమాంతం పెంచేసుకుంది. అనిరుధ్ లాంటి కోలీవుడ్ యువ సంగీత దర్శకుడిని చిత్రానికి ఎంపిక చేయటం ద్వారా ఫ్రెష్ ఆల్బమ్ ను అందించటంతోపాటు యూత్ ను బాగా ఆకట్టుకునేలా ఆల్బమ్ ను తీర్చిదిద్దబోతున్నాడంట. ఈ నేపథ్యంలో పాటలు ఖచ్ఛితంగా బాగుంటాయనే చెప్పుకుంటున్నారు. అఫ్ కోర్స్ పూర్తి ట్రాక్స్ ఇంకా బయటకు రాకముందే నిర్ణయయించటం కరెక్ట్ కాకపోయినా, వీళ్లిద్దరి కాంబో గత చిత్రాల ట్రాక్ ను పరిగణనలోకి తీసుకుని అభిప్రాయం వ్యక్తం చేస్తున్నారు. ఎలాగూ పవన్-త్రివిక్రమ్ కాంబోలో కథలు కూడా బాగుంటాయనే నమ్మకం ఉంది.