ఫోర్బ్స్ లిస్ట్ లో బాలీవుడ్ బాద్ షా టాప్

Posted: 08/31/2017 03:50 PM IST

సినిమాల పరంగా హిట్లు లేకపోయినా బాలీవుడ్ సీనియర్ హీరో షారూఖ్ ఖాన్ మరో ఘనత దక్కించుకున్నారు. బాలీవుడ్ లో అత్యధిక రెమ్యునరేషన్ తీసుకునే హీరోల జాబితాను ప్రముఖ బిజినెస్ మేగజైన్ ఫోర్బ్స్ విడుదల చేయగా, ఈ సంవత్సరం కింగ్ షారూక్ ఖాన్ తొలి స్థానంలో నిలిచాడు. ఆయన 'రయీస్' చిత్రంతో పాటు పలు బ్రాండ్లకు ప్రచారకర్తగా ఉంటూ 38 మిలియన్ డాలర్లు సంపాదించాడని, మిగతా వారికన్నా అధిక మొత్తంలో ఆదాయం పొందాడని ఫోర్బ్స్ పేర్కొంది.

ఇక రెండో స్థానంలో భాయిజాన్ సల్మాన్ ఖాన్ 37 మిలియన్ డాలర్ల ఆదాయంతో నిలువగా, అక్షయ్ కుమార్ 35.5 మిలియన్ డాలర్లతో మూడో స్థానంలో ఉన్నాడు. ఇక వీరందరికీ దూరంగా కేవలం 12.5 మిలియన్ డాలర్ల ఆదాయంతో అమీర్ ఖాన్ నాలుగో స్థానంలో ఉన్నాడని ఫోర్బ్స్ వెల్లడించింది. ఐదో స్థానంలో 11.5 మిలియన్ డాలర్లతో హృతిక్ రోషన్ ఉన్నారు.

లిస్ట్ లో ట్విస్ట్ ఇస్తూ ఆరో స్థానంలో 11 మిలియన్ డాలర్లతో దీపికా పడుకొనే, ఆపై 10 మిలియన్ డాలర్ల ఆదాయంతో రణవీర్ సింగ్, అంతే మొత్తం ఆదాయంతో ప్రియాంకా చోప్రా 7వ స్థానాన్ని పంచుకున్నారు. అమితాబ్ బచ్చన్, రణబీర్ కపూర్ లు 9, 10వ స్థానాల్లో ఉన్నారు.