కోర్టుకు హాజరైన వడివేలు, సింగముత్తు

Posted: 04/21/2017 10:09 AM IST

Vadivelu and singamuthu present madras hc in land case

వాళ్లిద్దరూ టాప్ కమెడియన్లు. ఇద్దరు కలిసి చేసిన పండించిన వినోదం అంతా ఇంతా కాదు. ప్రోఫెషనల్ గానే కాదు, రియల్ లైఫ్ లోనూ మంచి ఫ్రెండ్సే. కానీ, ఓ వివాదంతో బద్ధ శత్రువులుగా మారిపోయారు. కోలీవుడ్ కమెడియన్స్ వడివేలు, సింగముత్తుల గురించే ఇప్పుడు మనం చెప్పుకుంటున్నది.

గతంలో వీరిద్దరు కలిసి ఓ భూమిని కొన్నారు. తర్వాత దాని గురించి ఇద్దరి మధ్య మనస్పర్థలు వచ్చాయి. వడివేలుతో సింగముత్తు తాంబరం సమీపంలో కొంత స్థలాన్ని కొనిపించాడు. అయితే ఆ కొనుగోలుకు సంబంధించినవి నకిలీ దస్తావేజులని, సింగముత్తు తనను మోసం చేశాడని వడివేలు చెన్నై హైకోర్టులో పిటిషన్‌ దాఖలు చేశారు. విచారణ సందర్భంగా వీరిద్దరిని ఈ నెల 7న కోర్టుకు రావాల్సిందిగా న్యాయమూర్తి సూచించాడు.

అయితే వీరిద్దరు గైర్హాజరు కావటంతో ఆగ్రహించిన జడ్జి 20న హాజరు కావాల్సిందిగా ఆదేశించాడు. హాజరు కాని పక్షంలో వడివేలు, సింగముత్తులపై అరెస్ట్‌ వారెంట్‌ జారీ చేయనున్నట్లు హెచ్చరించాడు. దీంతో ఈ ఇద్దరు కమెడియన్లు తమ న్యాయవాదులతో హైకోర్టులో హాజరయ్యారు. కాగా, ఈ విషయంలో కాంప్రమైజ్ అయ్యేందుకు కూడా వీరిద్దరు ముందుకు రాకపోవటం విశేషం.

Vadivelu Singamuthu