బన్నీ ‘సరైనోడు’ శాటిలైట్ రైట్స్ అదుర్స్..

Posted: 04/17/2016 06:32 PM IST

దర్శకుడు బోయపాటి శ్రీను, హీరో అల్లుఅర్జున్ కాంబినేషన్‌లో తెరకెక్కిన ‘సరైనోడు’ సినిమా ఏప్రిల్ 22వ తేదీన విడుదలకు సిద్ధంగా వుంది. మాస్ డైరెక్టర్, స్టైలిష్ స్టార్ కాంబోలో రూపొందిన మూవీ కావడంతో దీనిపై మొదటి నుంచి భారీ అంచనాలే నెలకొన్నాయి. ఆ క్రేజ్ కారణంగానే ఈ చిత్రం విడుదలకు ముందే సరికొత్త రికార్డులు సృష్టిస్తోంది. ఇప్పటికే కొన్ని ఏరియాల్లో భారీ మొత్తానికి ఈ మూవీ థియేట్రికల్ రైట్స్ అమ్ముడుపోయి ఈ మూవీపై అంచనాల్ని మరింత పెంచేశాయి. ఇక తాజాగా ఈ సినిమా సాటిలైట్ రైట్స్ బిజినెస్ చూస్తే ‘సరైనోడు’కి ఏ స్థాయి క్రేజ్ ఉందో ఇట్టే అర్థమైపోతుంది.

ఇండస్ట్రీ వర్గాల నుంచి అందుతున్న సమాచారం ప్రకారం.. ఈ సినిమా తెలుగు, హిందీ, మళయాలం మూడు వర్షన్స్‌కు సంబంధించిన శాటిలైట్ హక్కులను సన్ నెట్‌వర్క్ సుమారు రూ.16 కోట్లకు కొనుగోలు చేసిందని తెలిసింది. రిలీజ్‌కు ముందు ఓ సినిమా ఈ స్థాయి శాటిలైట్ రెవెన్యూ సాధించడం తెలుగు చిత్రపరిశ్రమలో ఇదే మొదటిసారి. దీంతో.. బన్నీ తన కెరీర్‌లోనే సంచలన రికార్డ్ నమోదు చేసుకున్నాడు. రిలీజ్‌కి ముందు ఈ రేంజులో బిజినెస్ చేస్తున్న ‘సరైనోడు’.. రిలీజ్ తర్వాత బాక్సాఫీస్ దగ్గర కలెక్షన్ల సునామీ సృష్టించడం ఖాయమేనని ట్రేడ్ పండితులు అంచనా వేస్తున్నారు.

మరి.. ఆ అంచనాలకు తగ్గట్టుగా ‘సరైనోడు’ తన మాస్ పవర్‌ని బాక్సాఫీస్ దగ్గర చూపిస్తాడో లేదో వేచి చూడాల్సిందే. కాగా.. గీతా ఆర్ట్స్ పతాకంపై ఈ సినిమాని అల్లు అరవింద్ భారీ బడ్జెట్‌తో నిర్మించారు. ఇందులో బన్నీ ఆర్మీ ఆఫీసర్ పాత్రలో కనిపిస్తుండగా.. అతని సరసన రకుల్ ప్రీత్, క్యాథరిన్‌లు హీరోయిన్లుగా నటించారు. ఈ చిత్రంలో మాస్‌తోపాటు ఫ్యామిలీ ఆడియెన్స్‌ని అలరించే అంశాలున్నాయని చిత్రబృందం చెబుతోంది.

జి, మనోహర్