బాలయ్య ‘గౌతమీపుత్ర శాతకర్ణి’ టైటిల్ లోగో విడుదల

Posted: 04/08/2016 03:10 PM IST

సింహ, లెజెండ్, లయన్, డిక్టేటర్ వంటి వరుస హిట్ చిత్రాలతో ఇప్పటికీ 99 చిత్రాలను పూర్తిచేసుకున్న తెలుగు అగ్ర స్టార్ హీరో నందమూరి బాలకృష్ణ తన 100వ చిత్రాన్ని ఈరోజు ఉగాది పండగ సంధర్భంగా ప్రారంభించారు. ఈ చిత్ర ప్రారంభోత్సవ కార్యక్రమాన్ని ఆంధ్రప్రదేశ్ లోని అమరావతిలో అభిమానుల సమక్షంలో జరిపారు.

ప్రముఖ దర్శకుడు క్రిష్ దర్శకత్వంలో బాలయ్య 100వ చిత్రం తెరకెక్కనుంది. ఈ చిత్రానికి ‘గౌతమీపుత్ర శాతకర్ణి’ అనే టైటిల్ ను ఖరారు చేసారు. ఈ చిత్ర ప్రారంభోత్సవ కార్యక్రమంలో బాలకృష్ణ మాట్లాడుతూ... 99 చిత్రాల తర్వాత చేయబోయే 100వ సినిమాపై అభిమానులు ఎన్నో ఆశలు పెట్టుకున్నారు. వారి అంచనాలను అందుకోవాలంటే సరైన కథతో సినిమా తీయాలి. చాలా కథలు విన్నాను. కొన్ని నచ్చినప్పటికీ.. సరిగ్గా కుదర్లేదు. ఎట్టకేలకు ఈ ‘గౌతమీపుత్ర శాతకర్ణి’ కథ కుదిరింది అని అన్నారు.

అలాగే గౌతమి పుత్ర శాతకర్ణి చిత్రాన్ని తన తండ్రి నవరస నటన సార్వభౌమ, మాజీ ముఖ్యమంత్రి ఎన్టీఆర్ తెరకెక్కించాలని భావించారని... కానీ అది సాధ్యపడలేదన్నారు. ఈ సినిమా చేయడం దైవ నిర్ణయం అని చెప్పారు. తెలుగు వారు తెలుసుకోవాల్సిన చరిత్ర గౌతమి పుత్ర శాతకర్ణి అని బాలకృష్ణ పేర్కొన్నారు. గౌతమి పుత్ర శాతకర్ణి నవరసాలు ఉండే చిత్రం అవుతుందని బాలకృష్ణ ఆశాభావం వ్యక్తం చేశారు. ఈ కార్యక్రమంలో చిత్ర టైటిల్ లోగోను విడుదల చేసారు.