బాహుబలి కోసం రాబోతున్న అమితాబ్, షారుక్

Posted: 06/18/2015 10:03 AM IST

Baahubali hindi version premiere show date

‘బాహుబలి’ చిత్రాన్ని తెలుగుతో పాటుగా తమిళ, హిందీ, మలయాళ భాషలలో కూడా విడుదల చేస్తున్న విషయం తెలిసిందే. ప్రముఖ దర్శకుడు ఎస్.ఎస్.రాజమౌళి దర్శకత్వంలో తెరకెక్కుతున్న ఈ చిత్రాన్ని ఆర్కా మీడియా సంస్థ భారీ బడ్జెట్ తో ప్రతిష్టాత్మకంగా నిర్మిస్తుంది.

ఈ చిత్ర హిందీ వర్షెన్ ను బాలీవుడ్ ప్రముఖ దర్శక,నిర్మాత కరణ్ జోహర్ విడుదల చేస్తున్న విషయం తెలిసిందే. ఇప్పటికే తెలుగు, తమిళ, హిందీ వెర్షన్ ల థియేటర్ ట్రైలర్లు విడుదలై భారీ రికార్డులను క్రియేట్ చేస్తున్నాయి. ఈ చిత్రాన్ని ప్రపంచ వ్యాప్తంగా జులై 10న విడుదల చేయబోతున్నట్లుగా ఇటీవలే జరిగిన తెలుగు ఆడియో విడుదల కార్యక్రమంలో ప్రభాస్ అధికారికంగా ప్రకటించేసాడు.

బాహుబలి హిందీ వర్షెన్ కు స్పెషల్ ప్రీమియర్ షో ను ప్లాన్ చేసారు కరణ్ జోహర్. ఈ ప్రీమియర్ షో ను జులై 9న ఏర్పాటు చేయనున్నారు. ఈ ప్రీమియర్ షో కు అమితాబ్, షారుక్ ముఖ్య అతిథులుగా విచ్చేయనున్నారు. అలాగే బాలీవుడ్ స్టార్ హీరోహీరోయిన్లు, సినీ ప్రముఖులు ఈ షోకు హాజరు కానున్నారు. ఈ సినిమా విజయంపై కరణ్ జోహర్ చాలా నమ్మకంతో వున్నాడు.

ప్రస్తుతం ఈ చిత్ర పోస్ట్ ప్రొడక్షన్ పనులు చివరి దశకు చేరుకున్నాయి. మరికొద్ది రోజుల్లో భారీగా ప్రమోషన్ కార్యక్రమాలు మొదలుపెట్టనున్నారు. ప్రపంచ వ్యాప్తంగా నాలుగు భాషల్లో విడుదల కానున్న ఈ చిత్రానికి సంబంధించి ప్రమోషన్ కార్యక్రమాలు కనివినీ ఎరుగని రీతిలో జరపడానికి చిత్ర నిర్మాతలు సన్నాహాలు చేస్తున్నారు.

ఇప్పటికే కీరవాణి సంగీతం అందించిన పాటలు విడుదలై దుమ్ముధులుపుతున్నాయి. ప్రభాస్, రానా, అనుష్క, తమన్నా ప్రధాన పాత్రలలో నటించిన ఈ చిత్రంలో రమ్యకృష్ణ, నాజర్, సత్యరాజ్ కీలక పాత్రలలో నటించారు. భారీ అంచనాలతో విడుదల కానున్న ఈ సినిమా ఎన్ని రికార్డులను బద్దలుకొట్టనుందో మరికొద్ది రోజుల్లో తెలియనుంది.