ఎంతోకాలం ‘దీక్ష’ చేస్తే.. ఇప్పుడు వరించింది!

Posted: 03/17/2015 10:05 AM IST

మోడల్ గా కెరీర్ ప్రారంభించి ‘వేదం’ సినిమాతో వెండితెరకు పరిచయమైన నటి దీక్షాసేత్ అందరికీ గుర్తుండే వుంటుంది. ఆ మూవీ తర్వాత ఈమెకు మంచి ఆఫర్లే వచ్చాయి. స్టార్ హీరోల సరసన నటించే ఛాన్సులు వరించాయి. అయితే.. ఈమె నటించిన మూవీలు బాక్సాఫీస్ దగ్గర అంతగా సక్సెస్ కాకపోవడం వల్ల రానురాను ఈ అమ్మడికి ఆఫర్లే కరువైపోయాయి.

దీంతో అటు బాలీవుడ్ లో తన సినీకెరీర్ కి పరీక్షించుకోవడానికి వెళ్లగా.. అక్కడ కూడా మొదటి మూవీతోనే భారీదెబ్బ పడింది. ఈ దెబ్బతో అక్కడ కూడా ఆఫర్లు రాలేదు. దీంతో గతకొంతకాలం నుంచి ఈ ఢిల్లీ భామ కనిపించకుండా పోయింది. అయితే.. చాలాకాలం నిరీక్షణ చేసిన తర్వాత ఈ భామకు ఇప్పుడు ఓ మంచి ఆఫరే దక్కినట్లుగా వార్తలొస్తున్నాయి.

ప్రముఖ తమిళ దర్శకుడు సెల్వరాఘవన్ దర్శకత్వంలో శింబు హీరోగా ఓ సినిమా రూపొందనుంది. ఈ మూవీలో తొలుత ఎవరైనా స్టార్ హీరోయిన్ ను తీసుకోవాలని భావించినప్పటికీ.. అది కుదరక చివరికి దీక్షాసేథ్ ను కథానాయికగా ఎంచుకున్నారు. ప్రస్తుతం ప్రీ ప్రొడక్షన్ జరుపుకుంటున్న ఈ మూవీ షూటింగ్ త్వరలోనే ప్రారంభం కానుంది.

ఇక.. చాలారోజుల అనంతరం దీక్షకు ఈ తమిళ మూవీ ఆఫర్ రావడంతో ఫుల్ హ్యాపీగా వుందని సన్నిహిత వర్గాలు అంటున్నాయి. ఈ మూవీతో తనకు దక్షిణాదిన మరిన్ని ఆఫర్లు వచ్చే అవకాశముందని అమ్మడు ఆశిస్తోందని అంటున్నారు. మరి.. ఈ మూవీ ఆమె కెరీర్ ని ఏ విధంగా మలుపు తిప్పుతుందో వేచి చూడాల్సిందే!