గసగసాలతో చుండ్రు సమస్యకు చెక్

Posted: 09/11/2015 06:32 PM IST

అమ్మాయిల అందాన్ని ‘కురులు’ రెట్టింపు చేస్తాయి. జుట్టు అందంగా వుంటేనే మహిళల సౌందర్యం ఇంకా బాగా కనిపిస్తుంది. అలాకాకుండా జుట్టు పొడిగా, తెల్లగా వుంటే మాత్రం.. వారు అందవిహీనంగా కనిపిస్తారు. కాబట్టి.. ఏవిధంగా అయితే మహిళలు చర్మసౌందర్యానికి సంబంధించిన జాగ్రత్తలు తీసుకుంటారో.. అదేవిధంగా జుట్టు విషయంలోనూ తీసుకోవాలి. జుట్టు సంబంధిత సమస్యలపై ప్రత్యేక శ్రద్ధ తీసుకోవాలి.

ముఖ్యంగా కురులకు వచ్చే సమస్యల్లో చుండ్రు తరుచూ వెంటాడుతుంటుంది. ఈ సమస్య నుంచి వెంటనే విముక్తి పొందకపోతే.. చాలా పరిణామాలను ఎదుర్కోవలసి వస్తుంది. అంటే.. చుండ్రు అట్టగట్టినట్లు అయిపోయి పొలుసులుగా, పొక్కులుగా రాలుతూ, విపరీతమైన దురదను కలిగిస్తుంది. చుండ్రు వలన వెంట్రుకల కుదుళ్లు పటుత్వాన్ని కోల్పోయి పూర్తిగా ఊడిపోవడమూ జరుగుతుంది. అలాగే.. నల్లగా నిగనిగలాడే జుట్టు ఒక్కసారిగా పాలిపోయి, తెల్లగా మారిపోతాయి. ఫలితంగా అందవిహీనంగా మారుతారు. కాబట్టి.. చుండ్రును వెంటనే నివారించాలి. ఈ సమస్య నుంచి ఉపశమనం పొందాలంటే.. ఓ సింపుల్ చిట్కా వుంది. అదేమిటంటే..

వంటింట్లో ఉన్న గసగసాలను కొద్దిగా తీసుకుని, వాటికి పాలు చేరుస్తూ నూరుకోవాలి. తర్వాత దానిని తలకు బాగా పట్టించి, కాసేపు మర్దన చేసుకోవాలి. అది పూర్తిగా ఆరిన తర్వాత తలస్నానం చేయాలి. వారానికి రెండు మూడు సార్లు ఇలా చేస్తే.. మూడు వారాల్లో చుండ్రు సమస్య పూర్తిగా సమసిపోతుంది. ఈ చిట్కాను చాలా సుభమైంది, ఆరోగ్యకరమైందని నిపుణులు సూచిస్తున్నారు.