జుట్టు పెరుగుదలకు ఉపక్రమించే ఇంటి చిట్కాలు

Posted: 08/26/2015 01:21 PM IST

ప్రస్తుత రోజుల్లో ప్రతిఒక్కరు జుట్టు సంబంధిత సమస్యల నుంచి తీవ్ర ఇబ్బందులు ఎదుర్కొంటున్నారు. త్వరగా జుట్టు తెల్లబడిపోవడం, పొడిబారిపోవడం, కాలక్రమంలో రాలిపోవడం, ఇంకా ఇతర సమస్యలు వేధిస్తుంటాయి. వాటిల్లో ముఖ్యంగా జుట్టు రాలిపోయే సమస్య అమ్మాయిలు, మహిళల్ని తెగ ఇబ్బంది పెడుతుంది. ఇలా రాలిపోవడానికి కారణమేమిటంటే.. పోషకాహారం సరైన సమయంలో తీసుకోకపోవడమేనని నిపుణులు అంటున్నారు. ‘విటమిన్ ఏ’ లోపం వల్ల జుట్టు పెరగడం తగ్గుతుంది. దీంతో మరికొన్ని విటమిన్లు జుట్టుపై ప్రభావం చూపుతాయి. మరి.. ఈ సమస్యను అధిగమించాలంటే.. జుట్టు పెరగడానికి అవసరమైన ప్రొటీన్లు అధికంగా వుండే ఆహారాపదార్థాల్ని రెగ్యులర్ గా తీసుకుంటే చాలు.

బంగాళదుంపలో విటమిన్‌ ఎ అధికం. ఇది ఉత్పత్తి చేసే ఒక రకమైన నూనెలాంటి పదార్థం మాడుకు మేలు చేస్తుంది. మాడు పటిష్టంగా ఉంటే చుండ్రు తగ్గుతుంది. ఇక క్యారెట్‌, మామిడి, ఆప్రికాట్స్‌, గుమ్మడి, కర్భూజ వంటి పండ్లు జుట్టు ఒత్తుగా పెరిగేందుకు ఉపకరిస్తాయి. వీటిని ఆహారంలో ఉండేలా చూసుకోవడం చాలా అవసరం. గుడ్డు తింటే శరీరానికి ప్రొటీన్లు దండిగా లభిస్తాయి. జింక్‌, సెలీనియమ్‌, సల్ఫర్‌, ఐరన్‌ వంటి ఖనిజాలు కూడా గుడ్డులో పుష్కలం. వెంట్రుకలు చిట్లిపోకుండా ఆక్సిజన్‌ను అందించేందుకు ఇనుము తోడ్పడుతుంది. ఇనుము గుడ్డులోనే కాదు.. కోడిమాంసం, చేపల్లోను దొరుకుతుంది. ఐరన్‌, బీటా కెరొటిన్‌, పోలేట్‌, విటమిన్‌ సి.. వంటివన్నీ జుట్టు పెరుగుదలకు అవసరం. ఈ నాలుగూ తాజా పాలకూరల్లో ఉంటాయి.

ఒత్తయిన జుట్టు కావాలనుకుంటున్న వాళ్లు తరచూ పాలకూరను తినాలి. వాల్‌నట్స్‌ను కూడా మరువొద్దు. వీటిలో ఒమెగా త్రీ ఫ్యాటీ ఆసిడ్స్‌ అధికం. బయొటిన్‌, విటమిన్‌ ఇ వంటివి సెల్స్‌ను డ్యామేజ్‌ కాకుండా కాపాడతాయి. వాల్‌నట్స్‌లో ఉండే రాగి జుట్టుకు సహజమైన రంగును అందిస్తుంది. ఈ విధమైన చిట్కాలను రెగ్యులర్ గా పాటిస్తే.. ఫలితాన్ని గమనించవచ్చు.