పచ్చిపాలతో మెరుగైన సౌందర్యం

Posted: 08/10/2015 04:20 PM IST

సాధారణంగా ప్రతిఒక్కరు నిద్రలేవగానే టీ లేదా కాఫీ తీసుకుంటుంటారు. అలా తీసుకుంటే ఆరోగ్యానికి ఎంతో శ్రేయస్కరం. ఎందుకంటే.. పాలతో ఎముకలకు బలం చేకూరడంతోపాటు వ్యాధినిరోధక శక్తి చెందుతుంది. డీహైడ్రేషన్, ఊబకాయం, ఆస్టియోపోరోసిన్ వంటి సమస్యలకు పరిష్కారమూ లభిస్తుంది. ఇన్ని ఔషధగుణాలు కలిగి వున్న ఈ పాలలో అందాన్ని మెరుగుపరిచే మరెన్నో సుగుణాలు వున్నాయి. మార్కెట్ లో లభించే బ్యూటీ ప్రోడక్ట్స్ కంటే ఈ పాలతోనే సౌందర్యాన్ని రెట్టింపు చేసుకోవచ్చు. మరి.. ఎటువంటి పద్ధతుల్లో ఈ పాలను ఉపయోగించాలో తెలుసుకుందామా..

* ముఖం మీది దుమ్ము, మేకప్ లను తొలగించేందుకు ఉదయాన్నే ఆవుపాలు వాడితే ఫలితం బాగుంటుంది. కొద్దిగా పచ్చిపాల తీసుకుని అందులో దూదిని ముంచి.. ముఖం, మెడ మీద సున్నితంగా రుద్ది శుభ్రం చేయాలి. ఆ తరువాత గోరు వెచ్చటి నీళ్లతో ముఖాన్ని శుభ్రం చేస్తే చాలు.

* పొడి చర్మం గల వాళ్లకి ఆవుపాలు మంచి మాయిశ్చరైజర్‌గా పనిచేస్తుంది. అరటిపండు గుజ్జులో చల్లటి పచ్చిపాలను పోసి బాగా కలుపుకోవాలి. ఈ మిశ్రమాన్ని ముఖం మీద రాసుకుని అరగంట తరువాత కడుక్కోవాలి. రెండు రోజులు వరసగా ఇలా చేస్తే మెరుగైన సౌందర్యం మీ సొంతం అవుతుంది.

* యాంటీ ఏజింగ్‌ క్రీమ్‌లు వాడటంకంటే ఆవు పాలు వాడితే ఎంతో శ్రేయస్కరం. ఎందుకంటే ఈ పాలల్లో కూడా ఆల్ఫా హైడ్రాక్సిల్‌ యాసిడ్‌ ఉంటుంది. పాలు, తేనె, సీసాల్ట్‌లను కలిపితే సహజసిద్ధమైన స్క్రబ్‌ సిద్ధం అవుతుంది. ఈ స్ర్కబ్ తో వారానికి రెండు సార్లు మర్దనా చేస్తే మెరిసే చర్మం సొంతం.

* పాలలో కొన్ని చుక్కల రోజ్ వాటర్ ను కలిపి ముఖానికి అప్లై చేయాలి. తర్వాత ముఖంను సర్కులర్ మోషన్ లో రెండు మూడు నిముషాలు మర్ధన చేయాలి. ఆ తర్వాత చల్లటి నీటితో శుభ్రం చేసుకోవాలి. దాంతో చర్మ రంధ్రాలు తెరచుకొనేలా చేసి చర్మాన్ని శుభ్రం చేస్తుంది.

* బొప్పాయిలో వుండే ఎంజైమ్స్ చర్మాన్ని ప్రకాశించేలా చేసి, డెడ్ స్కిన్ ను అతిసులభంగా తొలగిస్తాయి. అటువంటి బొప్పాయితో పాలను కలిపి ముఖానికి పట్టిస్తే మంచిది. బొప్పాయి ముక్కలను పాలలో ముంచి.. ముఖానికి 5 ని||పాటు మర్ధన చేయాలి. ఇలా చేస్తే.. చర్మం ఫ్రెష్ గా అవుతుంది.