‘రావణ్ కీ ససురాల్’గా ప్రసిద్ధి చెందిన ‘మీరట్’ నగరం

Posted: 04/08/2015 06:48 PM IST

Meerut city history raavan ki sasural area ramayan book

మీరట్... ఉత్తరప్రదేశ్ రాష్ట్రంలోని ఒక జిల్లా, ప్రముఖ నగరము. అత్యంత పురాతనమైన ఈ నగరం జాతీయ రాజధాని ఢిల్లీకి 70 కి.మీ దూరంలో వుంది. ఇది ఢిల్లీ తర్వాత రెండవ పెద్ద ప్రాంతంగా ప్రసిద్ధి చెందింది. ఆర్థికపరంగా బాగానే అభివృద్ధి చెందిన ఈ ప్రాంతం నిజానికి ‘రావణ్ కీ ససురాల్’ అనే పేరుతో ప్రసిద్ధి చెందింది. అంటే.. ‘రావణుడి అత్తగారిల్లు’ అన్నమాట! దీనికి ఈ పేరు రావడం వెనుక ఒక పురాణ కథ కూడా వుంది.

పురాణ ప్రాముఖ్యత:

రామాయణం ప్రకారం.. రావణుని మామ అయిన మయాసురుని చేత ఈ మీరట్ నగరం ‘మయరాష్ట్రం’గా స్థాపించబడింది. అంటే.. అప్పట్లో మయాసురు పాలనలో ఈ నగరం రాజధానిగా వుండేది. అందుకే ఈ పట్టణం ‘రావణ్ కీ ససురాల్’గా ప్రసిద్ధి చెందింది. ఏ విధంగా అయితే రావణుడు శ్రీలంకను ఎంతో అద్భుతంగా, అందంగా స్థాపించాడో.. మయాసురుడుగా కూడా అదేవిధంగా ఈ ప్రాంతాన్ని అప్పట్లో విలాసవంతమైన హంగుఆర్భాటాలతో తీర్చదిద్దినట్లుగా పురాణాల్లో తెలుపుబడింది.

మీరట్ నగర విశేషాలు :

మీరట్‌లో ఓ సైనిక స్థావరం వుంది. ఇది విస్తీర్ణరీత్యా, జనాభారీత్యా భారతదేశంలో రెండవ పెద్ద సైనిక స్థావరంగా గుర్తింపు పొందింది. 1803 సంవత్సరంలో ఈస్ట్ ఇండియా కంపెనీ ఈ స్థావరాన్ని స్థాపించింది. ఇంకొక ముఖ్యమైన విషయం ఏమిటంటే.. 1857 ప్రథమ స్వాతంత్ర్య సంగ్రామం ప్రారంభమైనది కూడా ఈ ప్రాంతం నుంచే! 2007 సంవత్సరంలో మెట్రోపాలిటన్’గా ఈ నగరం ప్రకటించబడింది.

mayasur-history