పెద్ద చిట్టాతో బయల్దేరుతున్న కేసీఆర్

Posted: 12/05/2014 07:50 AM IST

తెలంగాణ ముఖ్యమంత్రి కేసీఆర్ మరోసారి ఢిల్లీకి వెళ్తున్నారు. మూడు రోజుల పర్యటన కోసం శుక్రవారం రోజు పర్యటన మొదలు పెట్టనున్నారు. ఈ దఫా పర్యటనలో ప్రధాని సహా పలువురు కేంద్ర మంత్రులను కలిసి రాష్ర్టంలో నెలకొన్న సమస్యల పరిష్కారం, రాష్ర్ట విభజనతో వచ్చిన సమస్యలకు పరిష్కారాలు చూపాలని కేంద్రాన్ని కోరనున్నారు. ఈ దఫా పెద్ద చిట్టాతోనే ముఖ్యమంత్రి మూడ్రోజుల హస్తిన పర్యటన చేపడుతున్నట్లు తెలుస్తోంది. పర్యటనలో ప్రస్తావించే అంశాలపై సీఎస్ రాజీవ్ శర్మ స్వయంగా నివేదికలు తయారు చేశారు.

తెలంగాణకు ప్రత్యేక హోదా, పారిశ్రామిక రాయితీలు, తొమ్మిది., పదవ షెడ్యూల్ లో పేర్కొన్న సంస్థల విభజన, వాటర్ గ్రిడ్, చెరువుల పునరుద్దరణకు సాయం, కేంద్ర ప్రభుత్వ పరిధిలోని ఉన్నతాధికారులు.., ఉద్యోగుల విభజన, ఎస్సీ వర్గీకరణ, ప్రాణహితకు జాతీయ హోదా, మహిళా రిజర్వేషన్లు, శంషాబాద్ విమానాశ్రయ పేరు మార్పు వంటి అంశాలతో పలువురు కేంద్ర మంత్రులను కలిసి విజ్ఞప్తులు అందించనున్నారు. అటు వచ్చే నెలలో తెలంగాణ ముఖ్యమంత్రి అమెరికా పర్యటనకు వెళ్తున్నారు. ఇందుకోసం డిప్లమాట్ వీసాను గురువారం రోజు దరఖాస్తు చేసుకున్నారు.

 

కార్తిక్