ఆన్ లైన్ లో ఇసుక అమ్మకం, డోర్ డెలివరి

Posted: 11/10/2014 08:21 PM IST

ఇన్నాళ్ళుగా ఆన్ లైన్ లో గుండు పిన్ను వరకు భవనాల అమ్మకాలను మనం చూశాం. ఇప్పుడు ఏపీ ప్రభుత్వం కొత్తగా ఆన్ లైన్ లో ఇసుక అమ్మేందుకు శ్రీకారం చుట్టింది. ప్రస్తుతం డ్వాక్రా సంఘాల ద్వారా ఇసుక అమ్ముతున్న సర్కారు.., ప్రజలకు మరింత చేరువయ్యేందుకు ఆన్ లైన్ లో ఇసుక వ్యాపారం మొదలు పెట్టింది. దీని ద్వారా అమ్మకందారుల దగ్గరకు వెళ్లనవసరం లేకుండా కేవలం ఆన్ లైన్ లో బుక్ చేస్తే ఇంటి దగ్గరకు ఇసుక వచ్చేలా చర్యలు చేపట్టినట్లు ఏపీ ముఖ్యమంత్రి కార్యాలయం ఒక ప్రకటనలో తెలిపింది.

ఇందుకోసం ప్రత్యేకంగ వెబ్ సైట్ రూపొందించారు. www.sandbyshg.ap.gov.in వెబ్ సైట్ ద్వారా అమ్మకాలు జరుపుతామని కావాల్సిన వారు బుక్ చేసుకోవచ్చని తెలిపింది. అటు ఫేస్ బుక్ లో కూడా ఇసుక అమ్మకాలపై ప్రత్యేకంగా పేజీ రూపొందించింది. sandminingbyshg పేజిలో ఇసుక అమ్మకాలపై పూర్తి సమాచారం ఉంటుందని వెల్లడించింది. ఇప్పటివరకు 1.55లక్షల క్యూబిక్ మీటర్ల ఇసుకను అమ్మటం జరిగిందనీ ఇంకా 3.27లక్షల క్యూబిక్ మీటర్ల ఇసుక అమ్మకానికి సిద్దంగా ఉందని వెల్లడించింది.

 

 

కార్తిక్