రేవ్ పార్టీ గుట్లు ఆలస్యంగా రట్టు.. కారణాలేమిటి..?

Posted: 10/07/2014 11:48 AM IST

మెట్రోనగరంగా పేరు పొందిన హైదరాబాద్ లో చెడు సంస్కృతి వేగంగా విస్తరిస్తోంది. అందులోనూ ఈ మద్య రేవ్ పార్టీల కల్చర్ ఎక్కువ అయింది. నగర శివార్లలోని దాబాలు, రిసార్టుల్లో జోరుగా రేవ్ పార్టీలు జరుగుతున్నాయి. ఇక వారాంతాల్లో అయితే ఇవి మరింత ఎక్కువ అవుతున్నాయి. తాజాగా హైదరాబాద్ శివారులోని రాజేంద్రనగర్ దగ్గర ఉన్న బాబుల్ రెడ్డి నగర్ లో జరిగిన రేవ్ పార్టీపై పోలీసులు దాడి చేశారు. ఆరుగురు యువతులతో పాటు పలువురు యువకులను అరెస్టు చేశారు. అరెస్టయిన వారిలో ఇద్దరు మైనర్లు కూడా ఉన్నారు.

అయితే ఆదివారం రాత్రి రేవ్ పార్టీపై దాడి చేసి యువకులను అరెస్టు చేయగా.., విషయం మాత్రం మంగళవారం బయటకు వచ్చింది. అరెస్టు చేసిన వెంటనే నిందితులకు వైద్య పరీక్షల కోసం పోలిస్ స్టేషన్ కు వైద్యుడిని పిలిపించినట్లు తెలుస్తోంది. అదేవిధంగా అర్ధరాత్రి మెజిస్ర్టేట్ ముందు హాజరుపర్చి అందరన్నీ రిమాండ్ కు తరలించారు. కానీ విషయం మాత్రం ఆలస్యంగా బయటకు వచ్చింది. పార్టీలో బడాబాబుల పుత్రరత్నాలు ఉండటం వల్లే విషయం బయటకు పొక్కకుండా జాగ్రత్తలు తీసుకున్నట్లు ఆరోపణలు వస్తున్నాయి. నిందితుల్లో పలువుర్ని తప్పించేందుకు ప్రయత్నాలు జరిగినట్లు కూడా ఊహాగానాలు వస్తున్నాయి.

కార్తిక్