బీహార్ ముఖ్యమంత్రికి అవమానం

Posted: 09/29/2014 02:34 PM IST

బీహార్ ముఖ్యమంత్రి జీతన్ రాం మాంఝీకి కులం కారణంగా అంటరానితనం పేరుతో అవమానం జరిగింది. ఈ విషయాన్ని స్వయంగా ముఖ్యమంత్రి వెల్లడించారు. తాను ఓ గుడిలోకి వెళ్ళి వచ్చిన తర్వాత ఆలయ వర్గాలు గుడిని ప్రక్షాళన చేశయన్నారు. ఈ విషయాన్ని పార్టీ సీనియర్ నేత లఖన్ రామ్ తనకు ఈ విషయం చెప్పారన్నారు. ఆలయంలో పూజలు చేసి వెళ్ళేంతవరకు నవ్వుతూ ఉన్న అర్చకులు, ఆలయ వర్గాలు.., తాను బయటకు వెళ్లగానే విగ్రహాలను కడిగేసి గుడిని ప్రక్షాళన చేశాయన్నారు.

అంతేకాకుండా ఆ వ్యక్తులు ఏదైనా అవసరం ఉంటే తన దగ్గరకు వచ్చి మోకరిళ్ళుతారని., అవసరం అయిపోగానే మాత్రం అంటరానివాడిగా చూస్తారని ఆవేదన వ్యక్తం చేశారు. ముఖ్యమంత్రి హోదాలో ఉన్న తననే అంటరానివాడిగా చూస్తే.. ఇక సామాన్యుల పరిస్థితి ఏమిటన్నారు. దళిత కుటుంబంలో పుట్టడమే తాను చేసిన పాపమా అని ప్రశ్నించారు. అగ్రవర్ణాల పేరుతో కొందరు వ్యక్తులు దళితుల పట్ల వివక్ష చూపటం సరికాదన్నారు. కాలం చెల్లిన మనుధర్మాన్ని ఇంకా పాటించటం సరికాదని జీతన్ జీ హితవు పలికారు.

కార్తిక్